నవతెలంగాణ-హత్నూర
           రాత్రి సమయంలో పాకలోని గొర్రెలపై వీధి కుక్కలు దాడి చేయడంతో.. 50 గొర్రెలు మృత్యువాత పడ్డాయి. ఈ ఘటన సంగారెడ్డి జిల్లా హత్నూర మండలం చందాపూర్‌లో సోమవారం రాత్రి జరిగింది. గొర్రెల యజమాని తెలిపిన వివరాల ప్రకారం.. చందాపూర్‌కు చెందిన పాపమొల్ల ఎల్లయ్య సోమవారం రాత్రి తన గొర్రెల మందను పాకలోకి కొట్టి నిద్రకు ఉపక్రమించాడు. ఈ మందపై రాత్రి సమయంలో వీధి కుక్కలు ఒక్కసారిగా దాడి చేయడంతో 50 గొర్రెలు మృత్యువాతపడ్డాయి.
కాగా సుమారు రూ.5 లక్షల వరకు నష్టం జరిగిందని బాధితుడు వాపోతున్నాడు. ఒక్కరాత్రిలో జీవనోపాధి లేకుండా పోయిందని కన్నీటి పర్యంతమవుతున్నాడు. ప్రభుత్వమే తనను ఆదుకోవాలని కోరుతున్నాడు. కాగా గ్రామంలో కుక్కలు గుంపులు గుంపులుగా తిరుగుతూ.. పశువులు, గొర్రెలు, మనుషులపై కూడా దాడులు చేస్తున్నాయని, వాటిని అరికట్టే విధంగా చర్యలు చేపట్టాలని గ్రామస్తులు కోరుతున్నారు.