నవతెలంగాణ బ్యూరో - హైదరాబాద్
యువకవి, రచయిత అనంతోజు మోహనకృష్ణ సాహిత్య వ్యాసాల సంకలనం 'ధార' ఆవిష్కరణ సభను శనివారం హైదరాబాద్‌లోని సుందరయ్య విజ్ఞాన కేంద్రంలో నిర్వహించనున్నారు. తెలంగాణ సాహితీ రాష్ట్ర ఉపాధ్యక్షులు రాంపల్లి రమేశ్‌ అధ్యక్షతన మధ్యాహ్నం రెండు గంటలకు ప్రారంభమయ్యే ఈ సభకు తెలుగు విశ్వవిద్యాలయం పూర్వ రిజిస్ట్రార్‌ ఆచార్య టి.గౌరీ శంకర్‌ ముఖ్య అతిథిగా హాజరై పుస్తకాన్ని ఆవిష్కరిస్తారు. నవతెలంగాణ దినపత్రిక సంపాదకులు ఆర్‌.సుధాభాస్కర్‌, తెరసం రాష్ట్ర అధ్యక్షుడు నాళేశ్వరం శంకరం, ప్రముఖ రచయిత్రి జ్వలిత, సినీ గేయ రచయిత మౌనశ్రీ మల్లిక్‌, తెలుగు అధ్యాపకులు డాక్టర్‌ బి.జయరావు, తెలంగాణ సాహితీ రాష్ట్ర ప్రధాన కార్యదర్శి కె.ఆనందాచారి, బీవీకే పూర్వ జనరల్‌ మేనేజర్‌ సీహెచ్‌ రాజారావు తదితరులు హాజరవుతారు. కేంద్ర సాహిత్య అకాడమీ యువ పురస్కార గ్రహీత తగుళ్ల గోపాల్‌ పుస్తకాన్ని పరిచయం చేస్తారు.
