- అది లేనోళ్లకు మాత్రం అత్యున్నత కొలువు...
- ప్రధాని మోడీపై ఎమ్మెల్సీ కల్వకుంట్ల కవిత సెటైర్‌
నవతెలంగాణ బ్యూరో - హైదరాబాద్‌
        ప్రధాని మోడీని ఉద్దేశించి బీఆర్‌ఎస్‌ ఎమ్మెల్సీ కల్వకుంట్ల కవిత ట్విటర్‌ వేదికగా ఆదివారం సెటైర్లు విసిరారు. కేంద్రంలోని బీజేపీపై సర్కారుపై తీవ్ర స్థాయిలో ఆమె విమర్శలు గుప్పించారు. 'నిజమైన డిగ్రీ సర్టిఫికెట్లు ఉన్న వాళ్లకు దేశంలో ఉద్యోగాలు రావు.. కానీ, డిగ్రీ లేని వాళ్లకు మాత్రం దేశంలోనే అత్యున్నత ఉద్యోగం ఉంది...' అంటూ మోడీని ఉద్దేశించి ఎద్దేవా చేశారు. దేశంలో నిరుద్యోగ రేటు 7.8 శాతంగా ఉందని ఈ సందర్భంగా ఆమె పేర్కొన్నారు. యువతకు ఏటా రెండు కోట్ల ఉద్యోగాలు కల్పిస్తామని ఇచ్చిన హామీ ఏమైందంటూ కేంద్ర ప్రభుత్వాన్ని ఆమె ప్రశ్నించారు. మోస పూరిత హామీతో దేశ యువతను బీజేపీ ప్రభుత్వం దగా చేసిందని విమర్శించారు. కేంద్రంలో ఖాళీగా ఉన్న 10 లక్షల ఉద్యోగాలు ఎప్పుడు భర్తీ చేస్తారంటూ ప్రశ్నించారు.