నవతెలంగాణ-హైదరాబాద్‌బ్యూరో
        భద్రాద్రి సీతారాముల కల్యాణోత్సవ తలంబ్రాలకు ప్రజల నుంచి మంచి డిమాండ్‌ వస్తున్నది. ఇప్పటివరకు లక్ష మందికి పైగా ఈ తలంబ్రాల కోసం టీఎస్‌ఆర్టీసీ కార్గో ద్వారా బుకింగ్‌ చేసుకున్నారు. మొదటి విడతలో 50 వేల మంది భక్తులకు తలంబ్రాలను హౌండెలివరీ చేయనున్నారు. ఆదివారం నుంచే ఈ డెలివరీ ప్రక్రియ ప్రారంభమైంది. డిమాండ్‌ దష్ట్యా తలంబ్రాల బుకింగ్‌ను ఈ నెల 10 వరకు పొడిగించారు. బుక్‌ చేసుకున్నవారికి రెండు, మూడు రోజుల్లో తలంబ్రాలను అందచేస్తారు. తలంబ్రాల తొలి బుకింగ్‌ను టీఎస్‌ఆర్టీసీ ఎండీ వీసీ సజ్జనార్‌, చైర్మెన్‌ బాజిరెడ్డి గోవర్థన్‌ అందుకున్నారు. బస్‌భవన్‌లో టీఎస్‌ఆర్టీసీ బిజినెస్‌ హెడ్‌(లాజిస్టిక్స్‌) పి.సంతోష్‌ కుమార్‌ ఎమ్‌డీ సజ్జనార్‌కు ముత్యాల తలంబ్రాలను అందజేశారు. అలాగే మంత్రుల నివాస ప్రాంగణంలో చైర్మెన్‌ బాజిరెడ్డి గోవర్థన్‌ దంపతులకు ఆర్టీసీ అధికారులు తలంబ్రాలను అందచేశారు. రాష్ట్రంలోని అన్ని టీఎస్‌ఆర్టీసీ కార్గో పార్శిల్‌ కౌంటర్లలో తలంబ్రాలను బుక్‌ చేసుకోవచ్చని సూచించారు. ఈ సేవలను పొందాలనుకునే భక్తులు టీఎస్‌ఆర్టీసీ లాజిస్టిక్స్‌ విభాగ ఫోన్‌ నంబర్లు 9177683134, 7382924900, 9154680020ను సంప్రదించాలన్నారు. తమ మార్కెటింగ్‌ ఎగ్జిక్యూటివ్‌లు కూడా ఆర్డర్‌ను స్వీకరిస్తారని తెలిపారు.