- ఘటనా స్థలంలోనే ఒకరు మృతి
- పాత కక్షలే కారణం అంటున్న పోలీసులు
నవతెలంగాణ-ధూల్‌ పేట్‌
హైదరాబాద్‌లోని కార్వాన్‌ టప్పాచబుత్ర పోలీస్‌ స్టేషన్‌ పరిధిలో మంగళవారం అర్ధరాత్రి కాల్పులు కలకలం రేపాయి. ఈ కాల్పుల్లో ఒకరు అక్కడికక్కడే మృతిచెందారు. కాల్పుల శబ్దానికి స్థానికులు ఒక్కసారిగా ఉలిక్కిపడ్డారు. ఇన్‌స్పెక్టర్‌ శ్రీనివాస్‌ రావు, స్థానికులు తెలిపిన వివరాల ప్రకారం.. స్థానికంగా నివాసముండే ఆకాష్‌ సింగ్‌కు కొందరికి మధ్య కొంతకాలంగా గొడవలు ఉన్నాయి. మంగళవారం రాత్రి కార్వాన్‌లోని తోప్‌ఖానాలో షబాబ్‌ హోటల్‌ సమీపంలో ఆకాష్‌ సింగ్‌(26) తన స్నేహితులతో కలిసి ఉండగా.. దుండగులు ఒక్కసారిగా అతనిపై కాల్పులు జరిపారు. దాంతో ఆకాష్‌ సింగ్‌ అక్కడికక్కడే మృతిచెందాడు. సమాచారం అందుకున్న పోలీసులు సంఘటన స్థలానికి చేరుకొని పరిస్థితిని సమీక్షించారు. మృతుడి సోదరుడి ఫిర్యాదు మేరకు కేసు దర్యాప్తు చేస్తున్నారు. పాత కక్షల కారణంగానే ఈ దాడి జరిగినట్టు పోలీసులు అనుమానిస్తున్నారు. మృతదేహాన్ని ఉస్మానియాకు తరలించారు. నిందితుల కోసం ప్రత్యేక క్లూస్‌ టీంను ఏర్పాటు చేశారు. వివిధ కోణాల్లో విచారణ చేపట్టారు.
