- 2.66 లక్షల మంది దరఖాస్తు: ఉన్నత విద్యామండలి
నవతెలంగాణ బ్యూరో - హైదరాబాద్‌
            రాష్ట్రంలో ఇంజినీరింగ్‌, అగ్రికల్చర్‌, ఫార్మసీ, బీఎస్సీ నర్సింగ్‌ కోర్సుల్లో ప్రవేశాల కోసం నిర్వహించే ఎంసెట్‌కు భారీగా దరఖాస్తులొస్తున్నాయి. ఇప్పటి వరకు 2,66,680 మంది అభ్యర్థులు దరఖాస్తు చేశారని ఉన్నత విద్యామండలి కార్యదర్శి ఎన్‌ శ్రీనివాసరావు గురువారం ఒక ప్రకటనలో తెలిపారు. ఆలస్య రుసుం లేకుండా దరఖాస్తుల సమర్పణకు తుది గడువు ఈనెల పదో తేదీ వరకు ఉందని పేర్కొన్నారు. వచ్చేనెల 10,11 తేదీల్లో ఎంసెట్‌ అగ్రికల్చర్‌, ఫార్మసీ విభాగం, అదేనెల 12 నుంచి 14వ తేదీ వరకు ఎంసెట్‌ ఇంజినీరింగ్‌ విభాగం రాతపరీక్షలను నిర్వహిస్తామని వివరించారు. ఈసెట్‌కు 15,285 దరఖాస్తులొ చ్చాయని తెలిపారు. వచ్చేనెల 20వ తేదీ వరకు దరఖాస్తు చేసేందుకు అవకాశముందని పేర్కొన్నారు. వచ్చేనెల రెండో తేదీన రాతపరీక్ష ఉంటుందని వివరించారు. ఐసెట్‌కు 20,150 దరఖాస్తులొచ్చాయని తెలిపారు. వచ్చేనెల ఆరో తేదీ వరకు దరఖాస్తు చేయొచ్చని సూచించారు. అదేనెల 26, 27 తేదీల్లో ఐసెట్‌ రాతపరీక్షలను నిర్వహిస్తామని పేర్కొన్నారు. పీజీఈసెట్‌కు 3,846 మంది దరఖాస్తు చేశారని వివరించారు. ఈనెల 30వ తేదీ వరకు దరఖాస్తు చేసేందుకు అవకాశముందని తెలిపారు. వచ్చేనెల 29 నుంచి జూన్‌ ఒకటో తేదీ వరకు పీజీఈసెట్‌ రాతపరీక్షలుంటాయని పేర్కొన్నారు. లాసెట్‌కు 24,583 దరఖాస్తులొచ్చాయని వివరించారు. దరఖాస్తు గడువు ఈనెల 20వ తేదీ వరకు ఉందని తెలిపారు. వచ్చేనెల 25వ తేదీన లాసెట్‌ రాతపరీక్షను నిర్వహిస్తామని పేర్కొన్నారు. ఎడ్‌సెట్‌కు 8,820 మంది దరఖాస్తు చేశారని వివరించారు. ఈనెల 20వ తేదీ వరకు దరఖాస్తు చేయొచ్చని సూచించారు. వచ్చేనెల 18న రాతపరీక్ష ఉంటుందని తెలిపారు. అత్యల్పంగా పీఈసెట్‌కు 616 మంది దరఖాస్తు చేశారని పేర్కొన్నారు. వచ్చేనెల ఆరో తేదీ వరకు దరఖాస్తు చేయొచ్చని తెలిపారు. జూన్‌ ఒకటి నుంచి పదో తేదీ వరకు రాతపరీక్షలుంటాయని వివరించారు.
లాసెట్‌ దరఖాస్తు గడువు 20 వరకు పెంపు
లాసెట్‌ దరఖాస్తు గడువును ఈనెల 20వ తేదీ వరకు పొడిగిస్తున్నట్టు కన్వీనర్‌ బి విజయలక్ష్మి గురువారం ఒక ప్రకటనలో తెలిపారు. ఆ తర్వాత గడువును పెంచబోమని స్పష్టం చేశారు.