నవతెలంగాణ-న్యూఢిల్లీ బ్యూరో
బీజేపీ జాతీయ అధ్యక్షులు జేపీ నడ్డా నివాసంలో కేంద్ర హౌం శాఖ మంత్రి అమిత్‌ షాను ఉమ్మడి ఏపీ మాజీ ముఖ్యమంత్రి కిరణ్‌ కుమార్‌ రెడ్డి శనివారం మర్యాదపూర్వకంగా కలిశారు. కర్నాటక ఎన్నికలపై నిర్వ హించిన భేటీలో బీజేపీ జాతీయ ప్రధాన కార్యదర్శి (సంస్థాగత) బి.ఎల్‌ సంతోష్‌, కర్నాటక ముఖ్యమంత్రి బొమ్మై, మాజీ ముఖ్యమంత్రి యడియూ రప్పలతో పాటు కిరణ్‌ కుమార్‌ రెడ్డి, బీజేపీ ఏపీ రాష్ట్ర ఉపాధ్యక్షులు విష్ణు వర్ధన్‌ రెడ్డి పాల్గొన్నారు. కర్నాటకలో పెద్ద సంఖ్యలో ఉన్న తెలుగు ఓటర్లను బీజేపీవైపు ఆకర్షించేలా అమలు చేయాల్సిన వ్యూహంపై కిరణ్‌ కుమార్‌ రెడ్డితో పార్టీ నేతలు చర్చించినట్లు సమాచారం. దక్షిణాదిలో బీజేపీ విస్తరణపై నడ్డాతో కిరన్‌ కుమార్‌ రెడ్డి చర్చించారని బి.ఎల్‌ సంతోష్‌ తెలిపారు. శనివారం రాత్రి రక్షణ శాఖ మంత్రి రాజ్‌నాథ్‌ సింగ్‌, కేంద్ర పర్యాటక శాఖ మంత్రి కిషన్‌ రెడ్డిలను కిరణ్‌ కుమార్‌ రెడ్డి మర్యాదపూర్వకంగా కలిశారు. కిరణ్‌ కుమార్‌ రెడ్డిని బీజేపీ ఏపీ రాష్ట్ర అధ్యక్షులు సోము వీర్రాజు కలిశారు.
