- 1 నుంచి 9వ తరగతి విద్యార్థులకు నిర్వహణ
నవతెలంగాణ బ్యూరో - హైదరాబాద్‌
           రాష్ట్రంలో ఒకటి నుంచి తొమ్మిదో తరగతి విద్యార్థులకు సమ్మేటివ్‌ అసెస్‌మెంట్‌ (ఎస్‌ఏ-2) పరీక్షలు బుధవారం నుంచి ప్రారంభం కానున్నాయి. ఈ మేరకు రాష్ట్ర విద్యా పరిశోధన, శిక్షణ మండలి డైరెక్టర్‌ ఎం రాధారెడ్డి సోమవారం సవరణ షెడ్యూల్‌ను విడుదల చేశారు. ఈనెల 20వ తేదీ వరకు ఈ పరీక్షలను నిర్వహిస్తామని తెలిపారు. ఒకటి నుంచి ఐదో తరగతి విద్యార్థులకు ఉదయం 9.30 నుంచి మధ్యాహ్నం 12 గంటల వరకు పరీక్షలుంటాయని వివరించారు. ఆరు, ఏడో తరగతి విద్యార్థులకు మొదటి రోజు పరీక్ష మధ్యాహ్నం ఒంటి గంట నుంచి సాయంత్రం మధ్యాహ్నం 3.45 గంటల వరకు నిర్వహిస్తామని తెలిపారు. ఆ తర్వాతి పరీక్షలను ఉదయం 9.30 నుంచి మధ్యాహ్నం 12.15 గంటల వరకు జరుగుతాయని పేర్కొ న్నారు. ఎనిమిదో తరగతి విద్యార్థులకు ఈనెల 12న మొదటి రోజు గణితం పరీక్షను మధ్యాహ్నం ఒంటిగంట నుంచి సాయంత్రం 3.45 గంటల వరకు నిర్వహిస్తామని తెలిపారు. ఈనెల 13న రెండో రోజు ఫిజికల్‌ సైన్స్‌ పరీక్షను ఉదయం 9.30 నుంచి మధ్యాహ్నం 12.15 వరకు, బయలాజికల్‌ సైన్స్‌ పరీక్షను మధ్యాహ్నం 2 నుంచి సాయంత్రం 4.45 గంటల వరకు జరుపుతా మని వివరించారు. ఆ తర్వాతి పరీక్షలను ఉదయం 9.30 నుంచి మధ్యాహ్నం 12.15 వరకు నిర్వహిస్తామని తెలిపారు. తొమ్మిదో తరగతి విద్యార్థులకు ఈనెల 12న మొదటి రోజు గణితం పరీక్షను మధ్యాహ్నం ఒంటిగంట నుంచి సాయంత్రం నాలుగు గంటల వరకు జరుగుతుందని పేర్కొన్నారు. ఈనెల 13న రెండో రోజు ఉదయం 9.30 నుంచి 11 గంటల వరకు ఫిజికల్‌ సైన్స్‌, 11.20 నుంచి మధ్యాహ్నం 12.50 గంటల వరకు బయలాజికల్‌ సైన్స్‌ పరీక్షను నిర్వహిస్తామని వివరించారు. ఆ తర్వాతి పరీక్షలు ఉదయం 9.30 నుంచి మధ్యాహ్నం 12.30 గంటల వరకు జరుగుతాయని తెలిపారు. తొమ్మిదో తరగతి విద్యార్థులకు ఆరు పేపర్లతోనే పరీక్షలు నిర్వహిస్తుండడం గమనార్హం. ఈనెల 19న ప్రభుత్వం ఐచ్ఛిక సెలవు ప్రకటించడంతో ఆరోజు పరీక్షలను ఈనెల 18న నిర్వహిస్తున్నట్టు స్పష్టం చేశారు.