- 70,041 మంది విద్యార్థుల దరఖాస్తు
- వెబ్‌సైట్‌ ద్వారా హాల్‌టికెట్ల డౌన్‌లోడ్‌కు అవకాశం
నవతెలంగాణ బ్యూరో - హైదరాబాద్‌
రాష్ట్రంలోని మోడల్‌ స్కూళ్లలో ఆరో తరగతితోపాటు ఏడు నుంచి పదో తరగతి వరకు ప్రవేశాలకు సంబంధించి ఖాళీ సీట్ల భర్తీ కోసం ఈనెల 16వ తేదీన రాతపరీక్ష జరగనుంది. ఈ మేరకు మోడల్‌ స్కూళ్ల అదనపు సంచాలకులు సిహెచ్‌ రమణకుమార్‌ మంగళవారం ఒక ప్రకటన విడుదల చేశారు. రాష్ట్రంలోని 194 మోడల్‌ స్కూళ్లలో ఆంగ్ల మాధ్యమంలో బోధన ఉంటుందని తెలిపారు. ఆదివారం ఉదయం 10 నుంచి మధ్యాహ్నం 12 గంటల వరకు ఆరో తరగతి, అదేరోజు మధ్యాహ్నం రెండు నుంచి సాయంత్రం నాలుగు గంటల వరకు ఏడు నుంచి పదో తరగతి వరకు దరఖాస్తు చేసిన విద్యార్థులకు పరీక్ష నిర్వహిస్తామని పేర్కొన్నారు. ఈనెల ఆరో తేదీ నుంచి www.tsmodelschools.com వెబ్‌సైట్‌ ద్వారా హాల్‌టికెట్లను డౌన్‌లోడ్‌ చేసుకునేందుకు అవకాశం కల్పించామని వివరించారు. 70,041 మంది విద్యార్థులు దరఖాస్తు చేశారని తెలిపారు. పరీక్షకు హాజరయ్యే విద్యార్థులందరూ కోవిడ్‌ నిబంధనలతోపాటు భౌతిక దూరాన్ని పాటించాలని సూచించారు.