- దళితబంధు యాడ్‌ చూసి జనం నవ్వుకుంటున్నరు : బండి
నవతెలంగాణ బ్యూరో-హైదరాబాద్
రాష్ట్రంలో దళితులకు ఇచ్చిన ఏ ఒక్క హామీని కూడా సీఎం కేసీఆర్‌ నెరవేర్చలేదని బీజేపీ రాష్ట్ర అధ్యక్షులు, ఎంపీ బండి సంజయ్‌కుమార్‌ విమర్శించారు. శుక్రవారం బీజేపీ రాష్ట్ర కార్యాలయంలో నిర్వహించిన అంబేద్కర్‌ జయంతి కార్యక్రమంలో ఆయన పాల్గొన్నారు. అనంతరం లోయర్‌ ట్యాంక్‌బండ్‌లోని అంబేద్కర్‌ విగ్రహాన్ని పూలమాల వేసి నివాళులు అర్పించారు. ఈ సందర్భంగా బండి మాట్లాడుతూ..ఇన్నేండ్లు అంబేద్కర్‌ జయంతి, వర్ధంతి కార్యక్రమాలకు ఎందుకు వెళ్లలేదని కేసీఆర్‌ను ప్రశ్నించారు. దళితుడిని సీఎం చేస్తానన్న హామీ ఏమైందని నిలదీశారు. దళితులకు మూడెకరాల భూమి ఇవ్వకపోగా, ఉన్న భూములను లాక్కుంటున్నారని విమర్శించారు. దళిత బంధు పథకంపై పత్రికల్లో వచ్చిన యాడ్‌ను చూసి ప్రజలు నవ్వుకుంటున్నారన్నారు. కేసీఆర్‌కు నిజంగా చిత్తశుద్ధి ఉంటే దళితబంధు కార్యక్రమంపై శ్వేతపత్రం విడుదల చేయాలని డిమాండ్‌ చేశారు. అంబేద్కర్‌ ఆశయాలను బీజేపీ కొనసాగిస్తున్నదనీ, అణగారిన వర్గాల వారికి రాష్ట్రపతి, గవర్నర్, కేంద్ర మంత్రి పదవులు ఇచ్చిందని చెప్పారు.
