- ఢిల్లీ నుంచి అధికారుల రాక
నవతెలంగాణబ్యూరో-హైదరాబాద్
తెలంగాణ రాష్ట్రంలో ఏడాది చివరన జరిగే అసెంబ్లీ సాధారణ ఎన్నికల నిర్వహణకు ఎన్నికల కమిషన్‌ (ఈసీఐ) సిద్దమవుతున్నది. ఎన్నికలను పకడ్భందీగా నిర్వహించేందుకు వీలుగా ఇప్పటి నుంచే యంత్రాంగాన్ని సిద్ధం చేస్తున్నది. ఈ మేరకు శనివారం ఢిల్లీ నుంచి సీనియర్‌ డిప్యూటీ ఎలక్షన్‌ కమిషనర్‌ నితీష్‌ వ్యాస్‌ నేతృత్వంలోని భారత ఎన్నికల సంఘానికి (ఈసీఐ) చెందిన ముగ్గురు సభ్యుల సీనియర్‌ అధికారుల బృందం హైదరాబాద్‌కు వచ్చింది. అనంతరం తెలంగాణ రాష్ట్ర ప్రధాన ఎన్నికల అధికారి (సీఈఓ) కార్యాలయంలో రాష్ట్ర ఎన్నికల అధికారులతో సమావేశాన్ని నిర్వహించింది. ఓటర్ల జాబితాను నిరంతరం పర్యవేక్షించాలనీ, జాబితా పక్కగా ఉండేలా చూడాలని అధికారులను కేంద్ర ఎన్నికల సంఘం అధికారి నితీష్‌ వ్యాస్‌ఆదేశించారు. అసెంబ్లీ ఎన్నికలను పకడ్భంధీగా నిర్వహించేందుకు వీలుగా రాష్ట్రవ్యాప్తంగా రిటర్నింగ్‌ అధికారుల (ఆర్‌ఓ) సమగ్ర జాబితాను సిద్ధం చేసి అప్‌డేట్‌ చేయాలని సీఈఓ వికాప్‌రాజ్‌ను ఆయన ఆదేశించారు.
