- నల్లగొండ జిల్లా మాడుగులపల్లి మండలంలో
నవతెలంగాణ-మాడుగులపల్లి
ధాన్యం కొనుగోలు కేంద్రంలో వడదెబ్బతో హమాలీ కార్మికుడు ప్రాణం కోల్పోయాడు. ఈ ఘటన నల్లగొండ జిల్లా మాడుగులపల్లి మండలంలోని దేవతలబాయిగూడెంలోని పీఏసీఎస్‌ ధాన్యం కొనుగోలు కేంద్రంలో జరిగింది. వివరాల్లోకి వెళితే.. దేవతలబాయి గూడెం గ్రామంలో పీఏసీఎస్‌ ఆధ్వర్యంలో నిర్వహిస్తున్న ధాన్యం కొనుగోలు కేంద్రంలో సేత్యాతండాకు చెందిన రమావత్‌ జాను(56) హమాలీగా పని చేస్తున్నాడు. ఎండ తీవ్రతకు వడదెబ్బకు గురై ధాన్యం కొనుగోలు కేంద్రంలోనే మృతిచెందాడు. అతనికి భార్య, నలుగురు పిల్లలు ఉన్నారు. డిప్యూటీ తహసీల్దార్‌ శివశంకర్‌, సీనియర్‌ అసిస్టెంట్‌ రేణుక మృతదేహానికి పంచనామా నిర్వహించారు.