- నేటినుంచి దరఖాస్తులకు ఆహ్వానం
నవతెలంగాణ బ్యూరో - హైదరాబాద్‌
         రాష్ట్రంలో టెక్నికల్‌ టీచర్స్‌ సర్టిఫికెట్‌ (టీటీసీ) 42 రోజులపాటు నిర్వహించే వేసవి శిక్షణ కోర్సు వచ్చేనెల ఒకటో తేదీ నుంచి ప్రారంభం కానుంది. శుక్రవారం నుంచి దరఖాస్తులను ఆహ్వానిస్తున్నామని ప్రభుత్వ పరీక్షల విభాగం సంచాలకులు ఎ కృష్ణారావు గురువారం ఒక ప్రకటనలో తెలిపారు. దరఖాస్తుల సమర్పణకు తుది గడువు ఈనెల 30వ తేదీ వరకు ఉందని పేర్కొన్నారు. వచ్చేనెల ఒకటో తేదీ నుంచి తరగతులు ప్రారంభమవుతాయని వివరించారు. జూన్‌ 11వ తేదీ వరకు జరుగుతాయని తెలిపారు. హైదరాబాద్‌, హన్మకొండ, నిజామాబాద్‌, నల్లగొండ, కరీంనగర్‌లో ఈ కోర్సు అందుబాటులో ఉంటుందని పేర్కొన్నారు. ఈనెల 20వ తేదీ నాటికి 18 ఏండ్లు నిండిన వారు 45 ఏండ్లలోపు వారు దరఖాస్తు చేసేందుకు అర్హులని వివరించారు. సెకండరీ స్కూల్‌ సర్టిఫికెట్‌ (ఎస్‌ఎస్‌సీ) లేదా తత్సమాన పరీక్షతోపాటు టెక్నికల్‌ సర్టిఫికెట్‌ కోర్సు (టీసీసీ)లో లోయర్‌ గ్రేడ్‌ ఉత్తీర్ణత కావాలని తెలిపారు. ఇతర వివరాలకు www.bse.telangana.gov.in వెబ్‌సైట్‌ను సంప్రదించాలని సూచించారు.