- ట్రైలర్‌ను విడుదల చేసిన కాసాని జ్ఞానేశ్వర్‌
నవతెలంగాణ-హైదరాబాద్
తెలుగుదేశం పార్టీ జాతీయ అధ్యక్షులు నారా చంద్రబాబు నాయుడు జన్మదినం నేపథ్యంలో ఆయన జీవిత చరిత్ర ఆధారంగా త్వరలో సినిమా తెరకెక్కనుంది. లోక నాయకుడు పేరుతో ఈ సినిమాను దర్శకుడు కిరణ్‌కుమార్‌ నిర్మించనున్నారు. చంద్రబాబు పుట్టినరోజు సందర్భంగా ఆయన బయోగ్రఫీ సినిమా ట్రైలర్‌ను గురువారం టీడీపీ రాష్ట్ర అధ్యక్షులు కాసాని జ్ఞానేశ్వర్‌ విడుదల చేశారు. కార్యక్రమంలో దర్శకుడు కిరణ్‌కుమార్‌, టీడీపీ రాష్ట్ర నాయకులు కాసాని వీరేష్‌, బండారి వెంకటేశ్‌, టీటీడీపీ రాష్ట్ర మీడియా కో-ఆర్డినేటర్‌ బియ్యని సురేష్‌, కాసాని సాయి పాల్గొన్నారు. నిబద్ధత గల దార్శనిక ప్రజా నాయకుడు అయిన మాజీ ముఖ్యమంత్రి చంద్రబాబునాయుడు జీవిత చరిత్ర ఆధారంగా లోకనాయకుడు సినిమాను నిర్మించడం సంతోషకరమని టీటీడీపీ అధ్యక్షులు కాసాని జ్ఞానేశ్వర్‌ వ్యాఖ్యానించారు. చంద్రబాబు జీవిత చరిత్రకు చిత్రరూపం ఇచ్చినందుకు దర్శకుడు కిరణ్‌కుమార్‌కు, చిత్ర బందానికి అభినందనలు తెలుపుతూ లోకనాయకుడు చిత్రం ప్రజల మన్ననలు పొంది భారీ విజయం సాధించాలని కాసాని జ్ఞానేశ్వర్‌ ఆకాంక్షించారు.
