- 24 నుంచి హాల్‌ టికెట్లు డౌన్‌లోడ్‌ చేసుకోవాలి :
టీఎస్‌ఎల్‌పీఆర్‌బీ చైర్మెన్‌ శ్రీనివాసరావు
నవతెలంగాణ-ప్రత్యేక ప్రతినిధి
ఈనెల 30న జరిగే కానిస్ట్టేబుల్‌, తత్సమాన పోస్టులకు తుది రాతపరీక్షకు అన్ని ఏర్పాట్లను పూర్తి చేశామని తెలంగాణ రాష్ట్ర స్థాయి పోలీసు రిక్రూట్‌మెంట్‌ బోర్డు (టీఎస్‌ఎల్‌పీఆర్‌బీ) చైర్మెన్‌ వి.వి శ్రీనివాసరావు తెలిపారు. హైదరాబాద్‌తో పాటు శివారు ప్రాంతాల్లో పరీక్షా కేంద్రాలను ఏర్పాటు చేసినట్టు ఆయన చెప్పారు. 30వ తేదీన ఉదయం 10 గంటల నుంచి 1 గంట వరకు ఒక పరీక్ష ఉంటుందనీ, మధ్యాహ్నం 2.30 గంటల నుంచి 5.30 గంటల వరకు కానిస్టేబుల్‌ ఐటీ అభ్యర్థు లకు పరీక్ష ఉంటుందని ఆయన తెలిపారు. నిర్ణీత సమయంలోగా అభ్యర్థులు పరీక్షా కేంద్రాలకు చేరుకోవాలనీ, పరీక్ష నిర్వహణ కోసం బోర్డు విధించిన నిబంధ నలను అభ్యర్థులు కచ్చితంగా పాటించాలని కోరారు. ఈ పరీక్ష నిర్వహణకు అవసరమైన పోలీసు అధికారులు, సిబ్బందిని నియమించడం జరిగిందని ఆయన చెప్పారు. కాగా, ఈనెల 24 నుంచి 28వ తేదీ వరకు అభ్యర్థులు తమ హాల్‌ టికెట్లను అధికారిక వెబ్‌సైట్‌ నుంచి డౌన్‌లోడ్‌ చేసుకోవాలని తెలిపారు.