నవతెలంగాణ బ్యూరో - హైదరాబాద్
రాష్ట్రంలో డిప్లొమా ఇన్‌ ఎలిమెంటరీ ఎడ్యుకేషన్‌ (డీఈఐఈడీ), డిప్లొమా ఇన్‌ ప్రీస్కూల్‌ ఎడ్యుకేషన్‌ (డీపీఎస్‌ఈ) కోర్సుల్లో 2023-25 బ్యాచ్‌ ప్రవేశాల కోసం డీసెట్‌-2023 రాతపరీక్ష జూన్‌ ఒకటో తేదీన నిర్వహించనున్నారు. ఈ మేరకు డీసెట్‌ కన్వీనర్‌ ఎస్‌ శ్రీనివాసాచారి మంగళవారం ఒక ప్రకటన విడుదల చేశారు. ఆన్‌లైన్‌లో దరఖాస్తుల స్వీకరణ ప్రక్రియ గతనెల 22 నుంచి ప్రారంభమైన విషయం తెలిసిందే. వాటి సమర్పణకు తుది గడువు ఈనెల 22వ తేదీ వరకు అవకాశమున్నది. ఇంటర్ లేదా తత్సమాన పరీక్షలో 50 శాతం మార్కులు వచ్చిన వారే దరఖాస్తు చేసేందుకు అర్హులని, ఎస్సీ,ఎస్టీ, వికలాంగులకు 45 శాతం మార్కులొచ్చినా దరఖాస్తు చేయొచ్చని సూచించారు. సెప్టెంబర్‌ నాటికి 17 ఏండ్లు నిండి ఉండాలని వివరించారు. తెలుగు, ఉర్దూ, ఇంగ్లీష్‌ మాధ్యమాల్లో డీసెట్‌ రాతపరీక్షలను నిర్వహిస్తామని పేర్కొన్నారు. ఇతర వివరాలకు http://deecet.cdse.telangana.gov.in వెబ్‌సైట్‌ను సంప్రదించాలని కోరారు.
