- సిద్దిపేట జిల్లాలో విషాదం
నవతెలంగాణ-మర్కుక్‌
            ప్రమాదవశాత్తు చెరువులో పడి ముగ్గురు మృతి చెందిన సంఘటన సిద్దిపేట జిల్లా వర్గల్‌ మండలం నెంటూర్‌ గ్రామంలో గురువారం చోటు చేసుకుంది. హైదరాబాద్‌లోని యాకత్‌పురకు చెందిన షేక్‌ కైసర్‌(28), అతని అన్నకొడుకు షేక్‌ ముస్తఫా(3), బంధువు షాపూర్‌ గ్రామానికి చెందిన మహమ్మద్‌ సోహెల్‌(17) బుధవారం కుటుంబ సభ్యులతో కలిసి గజ్వేల్‌ మండలం మాక్త మాసాన్‌పల్లిలోని బంధువుల ఇంటికి వచ్చారు. గురువారం మధ్యాహ్నం అందరూ కలిసి వర్గల్‌ మండలం నెంటూరు- సామలపల్లి గ్రామాల మధ్యలో ఉన్న చెరువు వద్దకు వెళ్లారు. చిన్న బాబు ముస్తాఫ్‌ ప్రమాదవశాత్తు చెరువులో పడటంతో బాలున్ని కాపాడేందుకు షేక్‌ కైసర్‌, సొహెల్‌ ఇద్దరూ చెరువులోకి దిగారు. వీరిద్దరికీ ఈత రాకపోవడంతో నీటిలో మునిగిపోయారు. గమనించిన కుటుంబ సభ్యులు లబోదిబోమంటూ రోధిస్తుండటంతో చుట్టుపక్కల వారు వచ్చి ఈతగాళ్ల సహాయంతో నీటిలో పడిన ముగ్గురిని ఒడ్డుకు చేర్చారు. అప్పటికే వారు మృతి చెందడంతో మృతదేహాలను గజ్వేల్‌ ప్రభుత్వ ఆస్పత్రికి తరలించారు. ఈ మేరకు బేగంపేట పోలీసులు కేసు నమోదు చేసుకుని దర్యాప్తు చేస్తున్నారు.