- గ్రీన్‌ఇండియా ఛాలెంజ్‌ ద్వారా పిలుపునిచ్చిన ఆర్‌.నారాయణ మూర్తి
నవతెలంగాణ బ్యూరో-హైదరాబాద్
పర్యావరణ పరిరక్షణ కోసం ప్రతి ఒక్కరూ బాధ్యతగా మొక్కలు నాటాలని సినీనటుడు, పీపుల్స్‌ స్టార్‌ ఆర్‌.నారాయణమూర్తి పిలుపునిచ్చారు. ఎంపీ సంతోశ్‌కుమార్‌ చేపట్టిన గ్రీన్‌ ఇండియా ఛాలెంజ్‌లో భాగంగా శనివారం జూబ్లీహిల్స్‌ జీహెచ్‌ఎంసీ పార్కులో ఆయన మొక్కలు నాటారు. ఈ సందర్భంగా ఆర్‌.నారాయణమూర్తి మాట్లాడుతూ.. సీఎం కేసీఆర్‌ హరితహారం స్ఫూర్తితో ఎంపీ సంతోష్‌ కుమార్‌ గ్రీన్‌ ఇండియా ఛాలెంజ్‌ చేపట్టి ఒక ఉద్యమంలా ముందుకు తీసుకువెళ్తున్నారని ప్రశంసించారు. దేశవ్యాప్తంగా ఎందరినో ఈ కార్యక్రమంలో భాగస్వామ్యం చేస్తూ పర్యావరణ పరిరక్షణకు తోడ్పడుతున్నారని ప్రశంసించారు. సకాలంలో వర్షాలు కురవాలన్నా, వాతావరణంలో మార్పులను అరికట్టాలన్నా మొక్కలను నాటడం ద్వారానే సాధ్యమన్నారు. సీఎం కేసీఆర్‌ నాయకత్వంలో తెలంగాణ సస్యశ్యామలంగా మారిందన్నారు.
