- రెండోరోజు 95.21 శాతం హాజరు
నవతెలంగాణ బ్యూరో - హైదరాబాద్
రాష్ట్రంలో ఎంసెట్‌ ఇంజినీరింగ్‌ విభాగం రాతపరీక్షలు ఆదివారంతో ముగియనున్నాయి. ఈ మేరకు ఎంసెట్‌ కన్వీనర్‌ బి డీన్‌కుమార్‌, కోకన్వీనర్‌ కె విజయకుమార్‌రెడ్డి శనివారం ఒక ప్రకటన విడుదల చేశారు. ఎంసెట్‌ ఇంజినీరింగ్‌ విభాగానికి రెండోరోజు ఉదయం నిర్వహించిన మొదటి విడతకు 34,655 మంది అభ్యర్థులు దరఖాస్తు చేయగా, 32,996 (95.21 శాతం) మంది పరీక్ష రాశారు.
మొదటి విడతకు 1,659 మంది గైర్హాజరయ్యారు. మధ్యాహ్నం నిర్వహించిన రెండో విడతకు 34,370 మంది దరఖాస్తు చేయగా, 32,722 (95.21 శాతం) మంది హాజరయ్యారు. రెండో విడతకు 1,649 మంది గైర్హాజరయ్యారు. ఈ పరీక్షలు జరుగుతున్న తీరును ఉన్నత విద్యామండలి చైర్మెన్‌ ఆర్‌ లింబాద్రి, జేఎన్టీయూ హైదరాబాద్ వీసీ కట్టా నర్సింహారెడ్డి పర్యవేక్షిస్తున్నారు.
14న అగ్రికల్చర్‌ విభాగం ప్రాథమిక కీ విడుదల
ఎంసెట్‌ అగ్రికల్చర్‌, ఫార్మసీ విభాగం రాతపరీక్షలను ఈనెల 10,11 తేదీల్లో నిర్వహించామని ఎంసెట్‌ కన్వీనర్‌ బి డీన్‌కుమార్‌ ఒక ప్రకటనలో తెలిపారు. ఈనెల 14న సాయంత్రం ఆరు గంటల నుంచి ప్రాథమిక కీతోపాటు అభ్యర్థుల రెస్పాన్స్‌ షీట్‌ను డౌన్‌లోడ్‌ చేసుకునేందుకు అవకాశముందని సూచించారు.
ప్రాథమిక కీపై ఏమైనా అభ్యంతరాలుంటే ఈనెల 16వ తేదీ సాయంత్రం ఆరు గంటలకు సమర్పించొచ్చని కోరారు. ఎంసెట్‌ వెబ్‌సైట్‌ ద్వారానే అభ్యంతరాలను స్వీకరిస్తామని తెలిపారు. ఇతర పద్ధతుల్లో స్వీకరించబోమని స్పష్టం చేశారు.
