నవతెలంగాణ - ఢిల్లీ: రెజ్లింగ్‌ ఫెడరేషన్‌ ఆఫ్‌ ఇండియా అధ్యక్షుడు, బీజేపీ ఎంపీ బ్రిజ్‌ భూషణ్‌ను ఆ పదవి నుంచి తొలగించాలని కోరుతూ రెజ్లర్లు చేపట్టిన ఆందోళనకు క్రమంగా మద్దతు పెరుగుతోంది. తాజాగా రెజ్లర్ల ఆందోళనకు రైతు సంఘం సంయుక్త కిసాన్ మోర్చా మద్దతు తెలిపింది. ఇందులో భాగంగా వారి ఆందోళనకు సంఘీభావం తెలియజేసేందుకు సంఘం నేతలు ఆదివారం ఢిల్లీకి పయనమయ్యారు. ఢిల్లీ సరిహద్దు రాష్ట్రాల నుంచి ఖాప్‌ పంచాయితీ నేతలు సైతం రెజ్లర్ల ఆందోళన స్థలికి బయల్దేరడంతో జంతర్‌ మంతర్‌తో పాటు ఢిల్లీ సరిహద్దుల్లో పోలీసులు భద్రతను కట్టుదిట్టం చేశారు.
బ్రిజ్‌ భూషణ్‌ను తొలగించాలంటూ జంతర్‌ మంతర్‌ వద్ద గడిచిన 10 రోజులుగా రెజ్లర్లు ఆందోళన చేస్తున్న సంగతి తెలిసిందే. ఈ క్రమంలో ఆదివారం వారికి సంఘీభావం తెలిపేందుకు పంజాబ్‌, హరియాణా, ఢిల్లీ, ఉత్తర్‌ప్రదేశ్‌ రాష్ట్రాలకు చెందిన రైతు నేతలు ఢిల్లీకి బయల్దేరారు. ఈ క్రమంలోనే టిక్రి బోర్డర్‌ వద్ద రైతులను పోలీసులు అడ్డుకున్నారు. ప్రైవేటు వాహనాలకు మాత్రమే అనుమతిస్తామని, ట్రాక్టర్లకు అనుమతి లేదని తిప్పి పంపుతున్నారు. మరోవైపు ఒకరోజు సంఘీభావం తెలియజేసేందుకు తాము ఢిల్లీ వెళుతున్నామని, ఒకవేళ ప్రభుత్వం సానుకూల నిర్ణయం తీసుకోకపోతే తమ తదుపరి కార్యాచరణను ప్రకటిస్తామని రైతు నేతలు ఈ సందర్భంగా తెలిపారు. మరోవైపు రెజ్లర్లకు మద్దతుగా దేశవ్యాప్త నిరసనలు చేపడతామని ఇప్పటికే సంయుక్త కిసాన్ మోర్చా పేర్కొంది. ఈ నెల 11 నుంచి 18 వరకూ అన్ని రాష్ట్ర రాజధానులు, జిల్లా, తాలూకా కేంద్రాల్లో సభలు, నిరసన ర్యాలీలను చేపడతామని తెలిపింది. గతంలో రైతు చట్టాలను వ్యతిరేకిస్తూ దిల్లీ సరిహద్దుల్లో ఈ సంఘం సుదీర్ఘకాలం పాటు పోరాడిన సంగతి తెలిసిందే.
