- రైట్‌ టు ఫుడ్‌ క్యాంపెయిన్‌ వెల్లడి
- వలస కార్మికులకు రేషన్‌ కార్డులు అందించాలని
- ఇప్పటికే ఆదేశించిన సర్వోన్నత న్యాయస్థానం
న్యూఢిల్లీ: ఈ-శ్రామ్‌ పోర్టల్‌లో నమోదైన వలస, అసంఘటిత కార్మికులకు రేషన్‌ కార్డులు అందించాలన్న సుప్రీంకోర్టు ఆదేశాలను రైట్‌ టు ఫుడ్‌ క్యాంపెయిన్‌ స్వాగతించింది. ఈ మేరకు ఒక ప్రకటనలో పేర్కొన్నది. ఏప్రిల్‌ 20, 2023న 'వలస కార్మికులకు సంబంధించిన సమస్యలు మరియు కష్టాలు' కేసులో ఈ ఉత్తర్వు ఆమోదించబడింది.
ప్రస్తుతం, 28.60 కోట్ల మంది వలసదారులు, అసంఘటిత కార్మికులు ఈ-శ్రామ్‌ పోర్టల్‌లో నమోదు చేయబడ్డారు. అందులో 20.63 కోట్ల మంది రేషన్‌ కార్డ్‌ డేటాపై నమోదు చేసుకున్నారు. అయితే, రేషన్‌ కార్డులు లేకపోవడంతో చాలా మంది వలస, అసంఘటిత కార్మికులు, వారి కుటుంబాలు జాతీయ ఆహార భద్రతా చట్టం కింద సబ్సిడీ ఆహార ధాన్యాలు మరియు ఇతర పథకాలను కోల్పోయారు. ఈ సమస్యను పరిష్కరించడానికి ఈ-శ్రామ్‌ పోర్టల్‌లో నమోదు చేసుకున్న 8 కోట్ల మంది ప్రజలకు జాతీయ ఆహార భద్రతా చట్టం కింద రేషన్‌ కార్డులు జారీ చేయాలని అన్ని రాష్ట్ర, కేంద్ర పాలిత (యూటీ) ప్రభుత్వాలను సుప్రీంకోర్టు ఆదేశించింది.
ఈ-శ్రామ్‌లో నమోదైన రేషన్‌ కార్డు లేని 8 కోట్ల మంది వలస, అసంఘటిత రంగ కార్మికులకు రేషన్‌ కార్డులు జారీ చేసేందుకు అన్ని రాష్ట్రాలు, కేంద్ర పాలిత ప్రాంతాలు వెంటనే కసరత్తు చేపట్టాలని రైట్‌ టు ఫుడ్‌ క్యాంపెయిన్‌ డిమాండ్‌ చేసింది. వలస, అసంఘటిత రంగ కార్మికులందరికీ ఎటువంటి ఆదాయ ప్రమాణాలతో సహా సంక్లిష్టమైన చేరిక, మినహాయింపు ప్రమాణాలు లేకుండా ప్రజా పంపిణీ వ్యవస్థ (పీడీఎస్‌)లో మార్పు తీసుకురావాలన్నారు.
తాజాగా ప్రచురించిన జనాభా లెక్కల ప్రకారం జాతీయ ఆహార భద్రతా చట్టం కింద కవరేజీని నవీకరించాలని గమనించడం ముఖ్యం. అయితే, 2021 జనాభా గణన నిరవధికంగా వాయిదా వేయబడింది. దీనికి సంబంధించి ఎలాంటి తేదీనీ తెలియజేయలేదు. ఇప్పటికే రేషన్‌ కార్డులు జారీ చేయవలసిన 10 కోట్ల మందికి పైగా ప్రజలు ఆహార భద్రత పరిధికి దూరంగా ఉండాల్సిన పరిస్థితి ఏర్పడింది.
ఈ వ్యక్తులు సమాజంలో అత్యంత ఆర్థికంగా బలహీనంగా ఉన్న వర్గాలలో ఉన్నారనీ, వారిని జాతీయ ఆహార భద్రతా చట్టం పరిధిలో తప్పనిసరిగా చేర్చాలని రైట్‌ టు ఫుడ్‌ క్యాంపెయిన్‌ నొక్కి చెప్పింది. సుప్రీంకోర్టు తీసుకున్న ఈ నిర్ణయం కోవిడ్‌-19 మహమ్మారి నేపథ్యంలో జీవనం సాగించేందుకు కష్టపడుతున్న లక్షలాది మంది వలస, అసంఘటిత కార్మికులకు ఉపశమనం కలిగిస్తుందని సామాజిక కార్యకర్తలు, నిపుణులు భావిస్తున్నారు.
