జెరూసలెం : దక్షిణ లెబనాన్‌పై ఇజ్రాయిల్‌ రక్షణ బలగాలు శుక్రవారం బాంబు దాడులు జరిపాయి. దీంతో గొలాన్‌ హైట్స్‌, ఎగువ గెలీలే ప్రాంతాల్లో తీవ్ర ఉద్రిక్త పరిస్థితి నెలకొంది. లెబనాన్‌ రాకెట్‌ దాడులకు ప్రతిగానే తాము ఈ చర్య తీసుకున్నామని ఇజ్రాయిల్‌ ఈ దాడులను సమర్థించుకునే ప్రయత్నం చేసింది. దక్షిణ లెబనాన్‌ వైపు నుంచి పదికి పైగా రాకెట్లు ప్రయోగించారనీ, వాటిల్లో చాలా వాటిని తాము తిప్పికొట్టామని ఇజ్రాయిలీ రక్షణ శాఖ సోషల్‌ మీడియాలో పోస్ట్‌ చేసింది.2006లో కూడా లెబనాన్‌పై ఇజ్రాయిల్‌ ఇదే విధంగా శతఘ్నుల తో పెద్దయెత్తున విరుచుకుపడింది. లెబనాన్‌పై రాత్రి పూట ఇజ్రాయిల్‌ వైమానిక దాడులు జరపడం ఇజ్రాయిల్‌ విస్తరణవాద కాంక్షను తెలియజేస్తున్నదని లెబనాన్‌ అధ్యక్షుడు మైఖెల్‌ అవూన్‌ విమర్శించారు.