- ఈక్వెడార్‌లో 68 మంది మృతి.. 25 మందికి గాయాలు
క్విటో: ఈక్వెడార్‌లోని ఓ జైలులో ఖైదీల మధ్య భారీ ఘర్షణ జరిగింది. ఈ కొట్లాటలో 68 మంది ప్రాణాలు కోల్పోగా, మరో 25 మంది తీవ్రంగా గాయపడ్డారు. గ్వాయాక్విల్‌ నగరంలోని లిటోరల్‌ జైలులో ఖైదీలు వీరంగం సృష్టించారు. దాదాపు 900 మంది పోలీసులు ఎనిమిది గంటల పాటు శ్రమించి పరిస్థితిని అదుపులోకి తీసుకొచ్చారు.జైలులో భారీ ఎత్తున మరణాలు సంభవించడంతో ఖైదీల బంధువులు కారాగారం వద్ద ఆందోళనకు దిగారు. తమవారు ప్రాణాలతో ఉన్నారో.. లేదో.. తెలపాలంటూ జైలు అధికారులను నిలదీశారు. మరోవైపు జైలులో జరిగిన మారణకాండకు సంబంధించిన కొన్ని వీడియోలు సామాజిక మాధ్యమాల్లో చక్కర్లు కొడుతున్నాయి. అంతర్జాతీయ మాదకద్రవ్యాల ముఠాకు చెందిన రెండు వర్గాల మధ్య ఈ ఘర్షణలు తలెత్తినట్టు ప్రాధమికంగా అంచనాకొచ్చారు.కాగా రెండు నెలల కిందట ఇక్కడి మరో జైల్లోనూ ఇదే తరహాలోనే ఘర్షణలు తలెత్తగా.. 119 మంది చనిపోయిన విషయం విదితమే.