- క్రిస్మస్‌ పరేడ్‌పైకి దూసుకెళ్లిన కారు
- ఐదుగురు మృతి..40మందికి పైగా గాయాలు
వాషింగ్టన్‌ : అమెరికాలోని విస్కాన్సిన్‌ రాష్ట్రంలో ఘోర ప్రమాదం చోటుచేసుకుంది. క్రిస్మస్‌ పరేడ్‌పైకి ఓ ఎస్‌యూవీ కారు వేగంగా దూసుకెళ్లింది. స్థానిక కాలమానం ప్రకారం..ఆదివారం సాయంత్రం ఈ ఘటన జరిగింది. మరికొద్ది రోజుల్లో క్రిస్మస్‌ పండుగను పురస్కరించుకుని మిల్‌వాకీ శివారులోని వాకీషా టౌన్‌లో ఆదివారం సాయంత్రం సంప్రదాయ వార్షిక పరేడ్‌ను నిర్వహించారు. వందలాది మంది ఉల్లాసంగా పాటలు పాడుతూ ర్యాలీగా వెళ్తున్న సమయంలో హఠాత్తుగా ఓ కారు ఢకొీట్టి మనుషులపై నుంచి దూసుకెళ్లింది. అక్కడే ఉన్న పోలీసు అధికారి కారుపై కాల్పులు జరిపి అడ్డుకునేందుకు ప్రయత్నించినప్పటికీ డ్రైవర్‌ ఆగకుండా వేగంగా అక్కడ్నుంచి వెళ్లిపోయాడు. ఊహించని పరిణామంతో ప్రజలంతా భయభ్రాంతులకు గురయ్యారు. అక్కడ్నుంచి పరుగులు తీశారు. ఈ ఘటనలో ఐదుగురు మృతిచెందినట్టు స్థానిక మీడియా వర్గాలు వెల్లడించాయి. అయితే మరణాలు ఇంకా ఎక్కువ ఉండే అవకాశమున్నట్టు తెలుస్తోంది. ప్రమాద ఘటనలో 40మందికి పైగా తీవ్రంగా గాయపడగా, వారిని హాస్పిటల్‌కు తరలించి చికిత్స అందిస్తున్నారు. క్షతగాత్రుల్లో 12మంది చిన్నారులు ఉన్నారు. పరేడ్‌పైకి కారు దూసుకెళ్లిన దృశ్యాలు ప్రస్తుతం సోషల్‌మీడియాలో వైరల్‌గా మారాయి. ఘటనకు కారణమైన ఎస్‌యూవీ కారు డ్రైవర్‌ను పోలీసులు అరెస్టు చేసినట్టు సమాచారం. అయితే ఘటనకు గల కారణాలు మాత్రం ఇంకా తెలియరాలేదు. ప్రస్తుతానికి ఇందులో ఎలాంటి ఉగ్రకోణం లేదని, దర్యాప్తు జరుపుతున్నామని పోలీసులు వెల్లడించారు.
