- పలువురు మృతి!
వాషింగ్టన్‌ : తుపాకీ సంస్కృతికి పెట్టింది పేరైన అమెరికాలో మళ్లీ కాల్పుల కలకలం రేగింది. మంగళవారం ఉదయం బ్రూక్లిన్‌ నగరంలోని ఓ రైల్వే స్టేషన్‌లో గుర్తుతెలియని దుండగుడు కాల్పులకు తెగబడటంతో అనేకమందికి బుల్లెట్‌ గాయాలయ్యాయి. రైల్వే స్టేషన్‌ ఆవరణలో పలువురు వ్యక్తులు రక్తపు గాయాలతో నేలపై పడివున్న ఫొటోలు సామాజిక మాధ్యమాల్లో దర్శనమిస్తున్నాయి. వారిలో కొందరు మృతి చెంది వుంటారని స్థానిక మీడియాలో వార్తలు వెలువడ్డాయి. కాల్పుల ఘటనలో ఎంతమంది చనిపోయారన్నది పోలీసులు అధికారంగా వెల్లడించలేదు. ఉదయం రద్దీ సమయంలో కాల్పుల ఘటన జరిగింది. మరికొన్ని కథనాల ప్రకారం, ఘటనాస్థలంలో పేలుడు పదార్థాలు కూడా లభ్యమైనట్టు ప్రచారం జరుగుతోంది. ఘటన జరిగిన వెంటనే అక్కడకు చేరుకున్న పోలీసులు, బ్రూక్లిన్‌లోని 36వ వీధి పరిసరాలను మూసేశారు. పౌరులు ఎవరూ అటుగా వెళ్లొద్దని స్పష్టం చేశారు. ప్రస్తుతం ఘటనపై పోలీసులు విచారణ జరుపుతున్నారు.
