- దక్షిణాఫ్రికాలో 15 మంది మృతి
జోహాన్సెస్‌బర్గ్‌ : ఒక బార్‌పై సాయుధులైన దుండగులు కాల్పులు జరపడంతో 15 మంది మరణించిన సంఘటన దక్షిణాఫ్రికాలోని సోవెట్‌ టౌన్‌షిప్‌లో చోటుచేసుకుంది. ఆదివారం తెల్లవారు జామున జరిగిన ఈ దారుణంలో మరో తొమ్మిది మంది తీవ్రంగా గాయపడ్డారు. కాల్పులు జరిపిన దుండగులు అక్కడి నుంచి వెంటనే పారిపోయారని, వారి గురించి గాలింపు కొనసాగుతున్నట్టు పోలీసులు తెలిపారు. కాల్పులు జరిపింది ఎంత మందో స్పష్టంగా తెలియడం లేదని చెప్పారు. ఈ సోవెట్‌ టౌన్‌షిప్‌ జోహాన్సెస్‌బర్గ్‌కు సమీపంలోనే ఉంది. దక్షిణాఫ్రికాలో ఉన్న అతిపెద్ద నల్లజాతీయుల టౌన్‌షిప్‌ల్లో ఒకటిగా పేరు తెచ్చుకుంది. కాగా, దక్షిణాఫ్రికాలో మరో నగరం పిటీర్‌మరిట్‌జబుర్గ్‌లో శనివారం అర్థరాత్రి జరిగిన మరొక కాల్పుల ఘటనలో నలుగురు మృతి చెందినట్టు స్థానిక మీడియాలో వార్తలు వస్తున్నాయి. అయితే ఈ ఘటనను పోలీసులు ఇంకా అధికారికంగా ధ్రువీకరించలేదు. ప్రపంచంలోనే అత్యంత హింసాత్మక దేశాల్లో దక్షిణాఫ్రికా ఒకటి. ఇక్కడ ప్రతీ ఏటా దాదాపు 20 వేల మందికి పైగా హత్యకు గురవుతుండటం గమనార్హం.
