- 20 మంది మృతి
రియాద్‌ : సౌదీ అరేబియాలో ఘోర బస్సు ప్రమాదం జరిగింది. ఈ ప్రమాదంలో 20 మంది మృతి చెందగా పలువురికి గాయాలైనట్టు అధికారులు తెలిపారు. హజ్‌ యాత్రకు వెళ్తున్న ఓ బస్సు ప్రమాదానికి గురైనట్టు అక్కడి మీడియా తెలిపింది. వివరాల ప్రకారం.. సౌదీ అరేబియా లోని అసిర్‌ ప్రావిన్స్‌లోగల అకాబత్‌ షార్‌ రహదారిపై సోమవారం సాయంత్రం 4 గంటల ప్రాంతంలో యాత్రికుల బస్సు ఖమీస్‌ ముషైత్‌ నుంచి అభాకు వెళ్తోంది. ఆ సమయంలో బస్సు బ్రేక్‌ ఫెయిల్‌ అవ్వడంతో డివైడర్‌ను ఢ కొట్టి బోల్తాపడింది. దీంతో ఒక్కసారిగా బస్సులో మంటలు చెలరేగాయి. ఈ ప్రమాదంలో 20 మంది యాత్రికులు మృతి చెందారు. మరో 29 మంది గాయపడ్డారు. సమాచారం అందుకున్న సివిల్‌ డిఫెన్స్‌ , సౌదీ రెడ్‌ క్రెసెంట్‌ అథారిటీ బృందాలు ఘటనాస్థలికి చేరుకుని సహాయక చర్యలు చేపట్టాయి. క్షతగాత్రులను చికిత్స నిమిత్తం సమీప ఆసుపత్రులకు తరలించారు. రంజాన్‌ నెల కావడంతో పలువురు ముస్లింలు మక్కా, మదీనా యాత్రలకు వెళ్తుంటారు. అయితే తొలి వారంలోనే ఈ ఘటన చోటు చేసుకోవడంతో స్థానికంగా తీవ్ర విషాదం నెలకొంది.
