రమేష్‌ సంఘర్షణ నుండి ఉద్భవించిన భావ తరంగాల ప్రతిబింబాలు. ఈ పుస్తకంలో వెలుగు పూలను తల్లిదండ్రుల ఆత్మీయతకు, భార్యపై ప్రేమకు, శ్రమైక జీవన సౌందర్యానికి, సాంఘిక చైతన్యానికి, సామాజిక స్పృహ అన్వయించి కవిత్వీకరించారు.
ఈ కవితా సంపుటి ప్రారంభంలోనే మనసు గిటారు మీటింది నా ఎదని పొక్కిలి చేసింది పాదరసంలా జారిపోకు వంటి కవితా శీర్షికలతో తొలి ప్రేమ మాధుర్యం నుంచి ప్రణయాన్ని కొత్త బావ ప్రతీకలతో మనసును హత్తుకునే విధంగా ఉంటాయి.
పచ్చి కొమ్మను మెలి పెట్టినట్లు/ నా మనసుని మెలిపెట్టి ఉంది. ఒక అమ్మాయి తన మనసును మెలి పెట్టింది. అది పచ్చి కొమ్మను మెలి పెట్టినట్లు మనసు కడలిలో ఆటుపోట్లు రేపి మనసును కదిలించింది అని హద్యంగా చెబుతాడు. పెదాల పర్వతాలపై నుండి /జారిన మాటలు/ నా తనువు పుష్పం పై/ భ్రమరంలా వాలిపో అంటాడు.
'నా మనసు కడలిలో సునామీ సష్టించింది' అనే కవితలో స్వచ్ఛమైన ప్రణయం తొలి సంబరం ఎంత బాగా ఉంటుందో తెలుపుతాడు, 'ప్రేమ పక్షులను బ్రతకనిద్దాం' అనే కవితలో పువ్వు వికసించినా అంత సహజంగా ప్రేమ వికసిస్తుంది సమాజంలోని కులమతాల కారణంగా పరువు హత్యలు జరుగుతున్నాయి కంప్యూటర్‌ యుగంలో కూడా ఈ పాశవిక చర్యలను ఖండించి ప్రేమను బతికిద్దాం. ప్రేమపక్షులు స్వేచ్ఛగా ఎగరనిద్దాం అంటూ నిలదీస్తాడు.
మాటల మధుర బంతులను విసిరి మనసు పొరల్లో పెనవేసుకున్న అర్ధనారి తన జీవిత భాగస్వామి గురించి ఎదపై గువ్వలా వాలి సప్తపదులు నడిచింది అంటాడు ధనలక్ష్మీ దరిచేరి కనక వర్షం కురిపించింది అంటాడు.
కవి అమ్మలో పరమాత్మను చూసు కుంటాడు. రక్తాన్ని పాలుగా మార్చిన అమ్మ మాటలకందని మహాకావ్యం, సష్టికి మూలాధారం అమ్మేనని అమ్మ కడుపు తీపిని అక్షరీకరించాడు. చిన్ననాటి నుండి నాన్నను గమనిస్తూ చెమట బిందువుల త్యాగాలను ఆకలింపు చేసుకుని నాన్న గుండె ధైర్యాన్ని త్యాగశీలి తను కొనియా డుతూ మా నాన్నే నా రోల్‌ మోడల్‌ అంటాడు.
స్వతహాగా ఉపాధ్యాయుడైన రమేష్‌ పిల్లల పట్ల అమితమైన ప్రేమను ప్రకటిస్తాడు. నవ్వుల నెలవంకలు రేపటి భావిభారత నిర్మాతలు జాతి మురిసిపోయే అగ్గిపిడుగులు జ్ఞానాన్ని వెదజల్లే పరిమళాలు అని మురిసిపోతాడు. కరోనా విలయతాండవంలో పాఠశాలలు మూతపడి పిల్లలందరూ ఇళ్లకే పరిమితమై బోసిపోయిన పాఠశాలను చూసి బాధపడతాడు. కరోనా అనంతరం పాఠశాలలు తెరుచుకోగానే పిల్లలందరూ పాఠశాలకు రావడంతో గేట్లన్ని తెరుచుకొని స్వాగత తోరణాలుగా ఆహ్వానం పలకడం పక్షులన్నీ ఏకమై పిల్లలతో జాతీయ గీతం బందగానం చేయడం, మైదానమంతా పిల్లల పాదాలు తాకిడితో మురిసిపోవడం మురిపంగా కవిత్వీకరించారు. ఆ తర్వాత సామాజిక సమస్యలు కరోనా వల్ల ప్రజలు పడిన ఇబ్బందులు, బాధలు, రాజకీయ వ్యవస్థలోని ప్లాస్టిక్‌ నవ్వుల రహస్యాన్ని విప్పి చెబుతాడు, ఈ దేశానికి ఆయువు పట్టులాంటి యువత మత్తు మందుకు బానిస కావడం డ్రగ్స్‌, హెరాయిన్‌, గంజారు వంటి మత్తు పదార్థాల వల్ల జీవితం నాశనం అయిపోతుంది అని ఆవేదన చెందుతాడు. 'తరువు' కవిత ఖండికలో చెట్టు ప్రాధాన్యతను మన కళ్ళ ముందుంచుతాడు.
'అంబేద్కర్‌ మహాశయుడు' 'చెడును చెరిపేద్దాం 'ఊరి చివర గుడిసెలు' 'నేటి మగువ' అనే కవితా ఖండికలో భారతదేశంలో స్వేఛ్చ, సమానత్వం, సౌభ్రాతత్వం ప్రబోధించి దేశానికి మార్గదర్శిలైనా అంబేద్కర్‌ మహానీయుడి జయంతులు, వర్ధంతులు జరుపుకోవడం వదిలి వేయడం కాదు ప్రతి గుండెలో అనునిత్యం అతని ఆదర్శాలతో జీవించాలని ప్రబోధిస్తాడు. భారతదేశంలో వేళ్ళూనుకొనిపోయిన మనువాద సిద్ధాంతాన్ని కూకటి వేళ్లతో పెకలించాలని స్వార్థపరులు సోమరిపోతులు కుల వ్యవస్థను కాపాడుకుంటారని, సమాజంలో అలాంటి కలుపు మొక్కలను ఏరి పారేయ్యాలి అంటాడు. ప్రస్తుతం రాజ్యాంగం మార్చాలనే చర్చ చేసే వాళ్ళకి రాజ్యాంగానికి తూట్లు పొడవడం మానేయాలని హెచ్చరిస్తాడు. భారత రాజ్యాంగం చేసిన శాసనాలు చట్టాల పట్ల గౌరవం లేకపోవడం కుల వ్యవస్థను కాపాడేవాడే చేస్తారని అంటాడు. రాజ్యాంగానికి పునాది సమానత్వం. కుల వ్యవస్థకు పునాది అసమానత్వం. రాజ్యాంగం మానవ నిర్మితమైనది. కుల వ్యవస్థ దేవుళ్ల ద్వారా నిర్మించారని చెబుతారు. రాజ్యాంగం ప్రజాస్వామ్యాన్ని కాంక్షిస్తుంది. కుల వ్యవస్థ నియంతత్వాన్ని పోషిస్తుంది. రాజ్యాంగం అన్ని మతాల వాళ్లకి ఆచరించదగ్గ గ్రంథం. కుల వ్యవస్థను కాపాడుకోవాలనే వారే రాజ్యాంగం పట్ల అనుచిత వ్యాఖ్యలు చేస్తున్నారు. రాజ్యాంగాన్ని దుర్వినియోగం చేయడం, వక్రీకరించడం, నిర్వీర్యం చేయడం వీళ్ళు పనిగా పెట్టుకున్నారు. ఇలాంటి వారిని తీక్షణంగా గమనించ వలసిన అవసరం ఉంది అంటారు. 'చరవాణి' కవితలు సెల్‌ ఫోన్ల వలన పిల్లలు యువత అశ్లీలత ఆదరించే స్థాయికి వచ్చారని వారిని కనిపెట్టుకుని ఉండాలంటారు. మహిళలపై జరిగే అఘాయిత్యాలు ఖండించాలి అంటారు. సూర్యుని నిద్రలేపే అడ్డా కూలీల దుఃఖాన్ని తెలుపుతారు.
కవి రమేష్‌ ప్రతి కవితలో ప్రారంభంలో సమస్యను కవితాత్మకంగా చెప్పుకుంటూ చివరిలో పాఠకుడికి పదునైన ప్రశ్నలు వేస్తారు మరి కొన్ని కవితలు సమాధానాలు ఉంటాయి కవికి పాఠకునికి మధ్య నిరంతరం ఆలోచనల ప్రవాహం సాగుతుంది. ఈ గ్రంథానికి 'వెలుగు పూల పరిమళం' అనే ముందుమాట రమేష్‌ అంతరంగాన్ని పట్టి చూపించారు సాహితీ ప్రపూర్ణ ఆచార్య బన్న ఐలయ్య గారు. నిజాయితీతో కూడుకున్న ప్రజాపక్షం కవిత్వమని ప్రముఖ కవి రామా చంద్రమౌళి మలినం అంటని కవిత్వమని సినీ గీత రచయిత మౌనశ్రీ మల్లిక్‌ ముందు మాటలు ఈ గ్రంథాన్ని ఆసాంతం చదవడానికి ఉపయోగపడతాయి.
- డాక్టర్‌ కర్రె సదాశివ్‌, 9949424726
