ఎన్ని సవాళ్ళెదురైనా వాటన్నింటిని అధిగమిస్తూ ముందుకు అడుగేయటమే ప్రగతి. వ్యత్యాసాల, అసమానతల నుంచి సమభావన, సమానతలవైపు ఆలోచించడం, ఆచరణకు పూనుకోవడమే పురోగతి. మనిషి వానర స్థితికి తిరిగి మళ్ళడు. ఎన్నో పోరాటాల పరిణామంలో సమత సాధన నాగరికత. అలాంటిది తిరోగమన ఆలోచనలు చర్చకు తేవడం అత్యంత అమానవీయమవుతుంది. ముఖ్యంగా స్త్రీల పట్ల వారి జీవనమూ, వ్యక్తిత్వాల నిర్దేశిత, నీతులూ, విధి విధానాలపై ఇష్టా రాజ్యంగా మాట్లాడటం గర్హనీయం.
   మాట్లాడటమే కాదు, రేపటి తరాన్ని తయారు చేసే విద్యా వ్యవస్థనూ ఆరకంగా మార్చాలనుకోవడం దుర్మార్గం. మొన్న సి.బి.ఎస్‌.ఇ. పదో తరగతి ఆంగ్ల సాహిత్య ప్రశ్నాపత్రంలో పదిమార్కులకు సంబంధించి ఇచ్చిన వ్యాసభాగంలో 'మహిళలు చదువుకోవడం, స్వేచ్ఛను అనుభవించడం వల్ల కుటుంబంలో, సమాజంలో క్రమశిక్షణ దెబ్బతింటున్నదని' వ్యాస రచయిత అభిప్రాయపడ్డాడు. అంతే కాదు, భార్యకు గృహ బానిసత్వం నుండి విముక్తి కలిగించడం వల్ల పిల్లలపై తల్లిదండ్రుల అదుపాజ్ఞలు నాశనమవుతున్నాయని, గతంలో వారు భర్తలకు విధేయులుగా ఉండేవారని, దానితో పిల్లలు కట్టుతప్పకుండా క్రమశిక్షణతో మెలిగేవారని పేర్కొన్న వ్యాసాన్ని ఇచ్చి, కొన్ని ప్రశ్నలు దానికింద వేసి సరైన సమాధానాలను విద్యార్థులను వెతికి రాయమన్నారు. ఇంతకంటే ఘోరం ఇంకేమయినా ఉందా? ఇలాంటి వాటితో రేపటి తరానికి ఏం బోధిస్తున్నారు.
   మహిళలు వంట ఇంటికే పరిమితమై పతికి సేవలు చేస్తూ పిల్లల్ని కని వారి బాగోగులు చూస్తూ జీవనం సాగిస్తే కుటుంబంలో క్రమశిక్షణ వర్థిల్లుతుందనే భావనను నేటి 21వ శతాబ్దంలో తీసుకురావటం ఎంత వెనక్కి మళ్లటం! మహిళ అన్నింటా మగవారితో సమానంగానే కాక అంతకు మించి రాణిస్తున్న ఆధునిక కాలంలో ఇలాంటివి నేర్పుతారా? ఇది బానిస సమాజపు ఆలోచనలోకి భవితను తీసుకుపోవటం కాదా! స్త్రీలు విద్యతో శాస్త్ర సాంకేతిక రంగాల్లో నిత్యం అభివృద్ధి చెందుతూ కాస్మోనాట్స్‌గా అంతరిక్షంలోకి పరిశోధనలో పయనిస్తున్న తరుణంలో, దేశపు రక్షణరంగంలో మిలటరీ అధికారులుగా బాధ్యతలు నిర్వర్తిస్తూ ధైర్యసాహసాలను ప్రదర్శిస్తున్న కాలంలో స్త్రీ ఇంటికే పరిమితం కావాలని ఆలోచించడమంత తుప్పుపట్టిన భావం మరేముంది!
   పార్లమెంట్‌లో, పౌర సమాజంలో తీవ్ర వ్యతిరేకత రావటంతో సి.బి.ఎస్‌.ఇ. ఆ వ్యాస భాగాన్ని తొలగించివేసింది. కానీ యేదో యాదృచ్ఛికంగా చోటు చేసుకుంటున్న అంశాలు కావివి. కేంద్రంలో ఛాందస మనువాద భావాలు గల పార్టీ అధికారంలోకి వచ్చినప్పటి నుండీ ఇలాంటి చర్చలే జరుగుతున్నాయి. ఆ పార్టీ వెన్నెముక సంస్థ అయిన రాష్ట్రీయ స్వయం సేవక్‌ సంఫ్‌ు అధినేత మోహన్‌భగవత్‌ బహిరంగంగానే ప్రకటిస్తూ వస్తున్నారు. మహిళలపై అత్యాచారాలు పట్టణ ప్రాంతాల్లోనే ఎక్కువని ఆయన సెలవిచ్చారు. ఇంటి పనుల కోసమే ఇల్లాలు అని పేర్కొన్నారు. లౌకిక విలువలకు, స్త్రీ పురుష సమానత్వాలకు వ్యతిరేకమయిన ఆలోచనలకు, రాజ్యాంగ విలువలకు పూర్తిగా విరుద్ధమయిన ఆలోచనాపరులు వీళ్ళు. వీళ్ళ నుండి మనం ఇంతకన్నా ఏమీ ఆశించలేము. ఇలాంటి భావాలున్న అధికార పార్టీలు స్త్రీలకు చట్టసభల్లో రిజర్వేషన్లు కల్పిస్తాయా! స్త్రీల సాధికారత కోసం కృషి చేస్తాయా! బేటీ బచావో, బేటీ పడావో నినాదాలు ప్రచారార్భాటాలకే పరిమితమయిన సత్యాన్ని కళ్లారా కంటున్నాము కదా!
   ఈ బూజుపట్టిన ఛాందస భావాలకు స్త్రీలలోనూ కొంత భాగం సమ్మతి తెలియజేయటం, సంప్రదాయం పేరుతో మూఢత్వాన్ని, అశాస్త్రీయతను ప్రచారంలోకి తెచ్చిన ఫలితం. ఈ మధ్యన ఒక సర్వే ప్రకారం తేలిన అంశమేమంటే భర్తలు భార్యలను కొట్టటం సహజమేనని, కొట్టవచ్చని అనేకమంది తెలిపినట్టు నివేదిక వెల్లడించింది. అదికూడా మహిళలే ఆ విధమైన అభిప్రాయాన్ని వ్యక్తం చేసినట్టు వివరించారు. ఇందులో ఆశ్చర్యం లేదు. ఇప్పటికీ చాలామంది మహిళలు పితృస్వామిక వ్యవస్థలోని పురుషాధిపత్యానికి సమ్మతిగానే ఉన్నారు. తరాలుగా కుల, స్త్రీ పురుష అసమానతలు సహజమైనవిగా, దైవ నిర్ణయాలుగా ప్రచారం చేసి ఆధిపత్యాన్ని చెలాయిస్తున్న సమాజం మనది. ఆధిపత్య వర్గాల ఆలోచనల్లోంచి బయటపడటానికే జ్యోతిబాఫూలే, సావిత్రబాయిఫూలేలు, సంఘ సంస్కర్తలు తీవ్ర కృషి చేశారు. వారి దారులమేరకే మహిళలు ఈమాత్రమయినా చైతాన్యాన్ని పొంది పురోగమిస్తున్నారు.
   ఈ మధ్య ఓ మనువాద భావాలుగల మహిళా ప్రముఖరాలే రేప్‌లు మన భారతీయ సంప్రదాయంలోనే ఉన్నాయని, అప్పుడూ ఉన్నాయి, ఇప్పుడూ ఉంటాయని చాలా తేలికగా చెప్పేసింది. మొన్న కర్నాటకలో ఓ ఎమ్మెల్యే ''రేప్‌ను ప్రతిఘటించలేనప్పుడు ఆ ఆనందాన్ని అనుభవంచటమే మంచిదని'' తన దుష్టత్వాన్ని వెల్లగక్కి వెనక్కు పీక్కున్నాడు. అసలు ప్రజల సమస్యలను పట్టించుకోకుండా ఈ అసమానతలకు ఆజ్యం పోస్తూ, అనుచిత వ్యాఖ్యలు చేస్తూన్నవారిని, తిరోగమన ఆలోచనలను తిప్పికొట్టాలి. చైతన్య వంతమై ఎండగట్టాలి.