గత రెండు దశాబ్దాలుగా మన టీవీ ఛానళ్లలో ప్రవచనకారుల బోధలు విపరీతంగా పెరిగాయి. నీతులు, సూక్తులు వల్లించడం, పురాణాల ఉదాహరణలతో నేటి సమాజాన్ని విశ్లేషించడం, ధర్మసూత్రాలు, ప్రవర్తనా నియమాలను నిర్దేశించే ప్రసంగాలు ఏ ఛానల్‌ వెతికినా వెల్లువెత్తుతున్నాయి. ఇవన్నీ ఆధునిక జీవనంలో ఎదురయ్యే సవాళ్లను, సమస్యలను గతంలోకి వెళ్లి, విశ్వాసాల ఆధారంగా ఉన్న వాటితో పరిష్కరించుకోవాలని సెలవిస్తుంటారు. వ్యవస్థ విధానాల ఫలితంగా ఎదురయ్యే ఇక్కట్లు, బాధలు, వేదనలు, దోపిడీలు, అరాచకాలు, అన్యాయాలు, నేరాలు మొదలయినవన్నీ మనుషుల వైయుక్తిక ప్రవర్తనల వల్లనే తలెత్తుతున్నాయని కంచుకంఠాలతో వచిస్తుంటారు. అసలు కారణాలను వెతకనీయకుండా దారిమళ్లిస్తుంటారు. ప్రపంచీకరణ తెచ్చిన అనేక దుష్ప్రభావాలకు పురాణసూక్తిని పరిష్కారం చేస్తారు. అమాయకులైన శ్రోతలు వారి వాగ్ధాటిలో ఓలలాడుతారు. అయితే ఈ ప్రవచనకారుల అసలు స్వరూప స్వభావాలు అప్పుడప్పుడు బయటపడి జనాన్ని గాయపరచి అసహ్యతను వెళ్లగక్కుతాయి.
అందుకు తాజా ఉదాహరణ ఓ ఘనాపాటి ప్రవచన పంకిలం. ప్రవచనమంటే ప్రసిద్ధమైన, గొప్పమాట. సూక్తి, హితోక్తి అని అర్థం. ఈయన వ్యంగ్యాత్మక ప్రవచనం. ఆధునికమైనదిగా అందంగా చెప్పుకునే అత్యంత మనువాదీకరించబడిన ప్రవచనం. మొన్నొకసారి మాట్లాడుతూ ఆడవాళ్ల వస్త్రధారణపై అవాకులు చెవాకులు పేలాడు. ''టీషర్టులు, పాయింట్లూ వేసుకుని కుర్రాళ్లను రెచ్చగొండుతున్నారని, నాలాంటి వాడికే మనసు మరలుతోందని, ఇక యువకులు ఊరకుంటారా!'' అని ప్రవచించారు. చక్కగా చీరకట్టుకున్న వాళ్ల జోలికి ఎవరూ రారని వక్కాణించాడు. స్త్రీలపైన ఘోరాలు, అఘాయిత్యాలు జరగటానికి వారి వస్త్రాలు కారణమని సెలవిచ్చాడు. ఇది మహిళలను, వారి స్వేచ్ఛను కించపరచే వ్యాఖ్యానం. ఆధునిక సమాజంలో మహిళలు పోలీసులుగా, సైనికులుగా, పైలెట్‌లుగా పరిశ్రమల్లో అనేక చోట్ల శ్రమచేస్తున్నారు. బాధ్యతలు నిర్వర్తిస్తున్నారు. వారందరికీ డ్రెస్‌ కోడ్‌ను ఈయన నిర్దేశిస్తాడా? ఏమిటీ మోరల్‌ పోలీసింగ్‌! ఆడవాళ్లనగానే మగవాళ్ల సుఖం కోసం, పిల్లల్ని కని వారికి సేవ చేయడం కోసమేననే ఛాందస భావాల ఆలోచనలలోంచి స్త్రీని చూస్తున్న దృష్టిలోప ఫలితమిది. చిన్న పిల్లల, పసికందులపైన జరుగుతున్న అఘాయిత్యాలకు కారణమేమని చెబుతారో వీళ్లు. ప్రవచనం అనే పేరుతో మూఢ విశ్వాసాలను, ఛాందస, మనువాద భావాలను ప్రచారం చేసేవాళ్లు ఆధునిక ప్రజాస్వామిక, సమతా భావనలను ధ్వంసం చేస్తున్నారు. ఇక ఆరోగ్య సూత్రాలు బోధించి, వేల కోట్ల రూపాయల వ్యాపారం చేస్తున్న మరో బాబా ప్రవచనం మరింత నీచానికి దిగజారింది. మొన్న మహారాష్ట్రలోని పూనేలో ఒక మహిళల యోగా శిక్షణ కార్యక్రమంలో మాట్లాడుతూ ''ఆడవాళ్లు చీరెలో, సల్వార్‌ సూట్‌లో అందంగా ఉంటారు. లేదా నాలాగా బట్టలేసుకోకున్నా బాగుంటారని'' తన చిల్లర బుద్ధిని బయట పెట్టుకున్నారు. స్త్రీలపట్ల ఇంత అవమానకరంగా బోధించేవారు బాబాలుగా గురువులుగా చలామణి కావడం కన్నా ఇంకా ఘోరమైన దేమున్నది!
ఇంకోకాయన ఉన్నారు. ఆయన మహిళలు చేయాల్సిన పనులగురించి గొంతెత్తి చెబుతారు. భర్తకు సేవ చేయటమే భార్య విధి, కర్తవ్యమని బోధిస్తారు. భర్త విడిచిన బట్టలుతకాలి, వంట వండాలి, వడ్డించాలి, భర్త తిన్న విస్తరిలోనే భార్య తినాలి. భర్తను దైవంగా పూజించాలి. ఇదీ ఆయన బోధ. ''మగడు వేల్పన పాత మాటది, ప్రాణమిత్రుడ నీకు'' అని వందేండ్ల క్రితమే అన్న గురజాడ ఎక్కడ... ఈ అడుగంటిన మూర్ఖాలోచనల ప్రవచన కారులెక్కడ! ఆయన తన కాలానికి వందేండ్లు ముందుంటే, వీళ్లు వేయ్యేండ్లు వెనుకుండి చెలామణికావటం ఒక విషాదం. స్త్రీల పట్ల ఒక సమానతా భావాన్ని ప్రకటించిన మహానుభావుడు, హేతువాది, అభ్యుదయ భావుకుడు గురజాడవారి పేరు మీద ఇచ్చే పురస్కారాన్ని ఈయనకు ఇవ్వాలని, విజయనగరంలోని గురజాడ సాంస్కృతిక సంస్థవారు పూనుకోవడం ఒక విడ్డూరమైన చర్య. ఈ మూడు విషయాలూ మన సమాజంలోకి ఎలాంటి ఆలోచనలు వచ్చి చేరుతున్నాయో తెలియజేసే సంఘటనలు. వీటిని అడ్డుకుని నిలువరించకపోతే మరింత మూఢత్వం ప్రజ్వరిల్లే ప్రమాదం ఉంది. నేడు స్త్రీలపై పెరుగుతున్న గృహహింసను అరికట్టాలని చేస్తున్న వారోత్సవాల సందర్భంగా ఈ ప్రవచనకారుల, బాబాల దుర్మార్గపు దాడిని ముందుగా అరికట్టవలసి ఉన్నది. నీతి బోధకుల మూతులు మూయించకపోతే మరింత మురికిపారే ప్రమాదముంది.
