''ఈడీ...'' ఇప్పుడిది దేశంలో మోడీతో పాటే వినపడుతున్న మాట. ఇంకా చెప్పాలంటే ''మోడీయే ఈడీ - ఈడీయే మోడీ'' అన్న చందంగా ఇవి ఒకదానికొకటి పర్యాయ పదాలుగా మారిపోయాయి. క్రమేణా ఈ రెండూ జతకూడి ''మోడీ ఈడీ'' అనే ఒకే పదంగా రూపాంతరం చెందాయి. అంతిమంగా ఇప్పుడీ పదం ప్రజల సరికొత్త అభివ్యక్తికి ప్రతీకగా వాడుకలోకొచ్చింది. ప్రతిపక్షాల చేతిలో ఓ పదునైన విమర్శకు ప్రాతినిధ్యం వహిస్తోంది. అందువల్ల ప్రస్తుతం దేశంలో ఏ ప్రాంతానికెళ్ళినా వినిపించే మాట ''మోడీ ఈడీ''. తాజాగా బీఆర్‌ఎస్‌ ఎమ్మెల్సీ, ముఖ్యమంత్రి కేసీఆర్‌ తనయ కవితపై విచారణ నేపథ్యంలో మన తెలంగాణలోనూ ఇది ''మహ''పాపులారిటీ సాధించింది. నేడు ఈ ''మోడీ ఈడీ'' దాడులంటూ లేని రాష్ట్రమూ, రాజకీయ విపక్షమూ లేదంటే అతిశయోక్తి కాదేమో!
దేశం నలుమూలలా తమ అధికార వాంఛ నెరవేర్చే ఆయుధంగా ఈడీని వాడుతోంది మోడీ సర్కార్‌. ఒక్క ఈడీ ఏం ఖర్మ... సమస్త దర్యాప్తు సంస్థల నుండి గవర్నర్‌ల వ్యవస్థ వరకూ ప్రతిదీ ఇందుకు సాధనమే. ప్రత్యర్థులను లొంగదీసుకోవడానికీ, ప్రభుత్వాలను ఏర్పాటు చేసుకోవడానికి వీటన్నిటినీ వాడుకోవడం ఒక విధానంగా సాగిస్తోంది మోడీ నేతృత్వం. నేడు దేశంలోని బీజేపీ ప్రభుత్వాలలో ప్రజలచే ఎన్నికైన వాటి కంటే ఇలా దొడ్డిదారిన ఏర్పాటు చేసుకున్నవే ఎక్కువ కావడం ఒక భౌతిక వాస్తవం. అయితే, ఈ దర్యాప్తు సంస్థల దాడులకు గురవుతున్నవారంతా నిర్దోషులేనని చెప్పలేం. కానీ, ఈ మోడీ కాలంలో ఈడీ లేదా ఇతర దర్యాప్తు సంస్థలు నమోదు చేసిన కేసుల్లో నేర నిరూపణ రేటు కేవలం 0.5శాతం మాత్రమే. అదే సమయంలో ఈ కేసుల్లో ఇరుక్కున్న అవినీతి నేతలనేకులు బీజేపీలో చేరితే రాత్రికి రాత్రే పునీతులు కావడం, లేదా దర్యాప్తులన్నీ ఉన్నఫలంగా నిలిచిపోవడం నిర్లజ్జగా జరిగిపోతోంది. ఇది మొదట్లో విస్తుగొలిపినా, ఆ తరువాత సర్వసాధారణంగా మారిపోయింది. అందుకే నిన్నగాక మొన్న అమిత్‌షా హైదరాబాద్ పర్యటనకు ''వాషింగ్‌ పౌడర్‌ నిర్మా'' అంటూ ఆసక్తికరమైన ప్రకటనలు స్వాగతం పలికాయి. వారితో చేరితే ఎంతటి అవినీతి మరకలైనా తొలగిస్తారన్నది వాటి సారాంశం. అవి ఏర్పాటు చేసింది ఎవరో, అందులో వారి ప్రయోజనమేమిటో తెలియదు గానీ, అవి ఇచ్చే సందేశం మాత్రం ఓ సత్యం. ఈ దాడుల లక్ష్యం అధికార విస్తరణ, ప్రత్యర్థులపై కక్షసాధింపే తప్ప, అవినీతిని నిర్మూలన ఎంత మాత్రమూ కాదనడానికి ఇంతకన్నా నిదర్శనం ఏం కావాలి?
ఇప్పుడు తెలంగాణలో జరుగుతున్నది కూడా అదే. కవిత విషయంలో ఈడీ విచారణా తతంగమంతా కేవలం కేసీఆర్‌ను బలహీనపరిచే ప్రయత్నమే తప్ప మరొకటి కాదు. అయితే ఇక్కడ ఉద్దేశం కవిత నిర్దోషి అని చెప్పడం కాదు. నిజంగానే లిక్కర్ స్కామ్‌ జరిగిందా? జరిగితే అందులో కవిత పాత్ర ఉందా లేదా? అన్నవి తేలాల్సిన విషయాలే. కానీ ఆమెపై ఈడీని ప్రయోగించడం వెనుక గల రాజకీయ దురుద్దేశం మాత్రం ఓ బహిరంగ రహస్యం. అందువల్ల ఈ మొత్తం వ్యవహారంలో తెలంగాణలో రాజకీయాధికారాన్ని స్వాధీనం చేసుకోవాలన్న కుతంత్రం తప్ప, అవినీతి పరులను పట్టుకోవాలన్న నిజాయితీ ఆవగింజంతైనా కనిపించదు. విపక్ష నేతల మీదే తప్ప స్వపక్ష నేతలపై ఎలాంటి దాడులూ దర్యాప్తులూ ఈ మోడీ కాలంలో ఎరుగం. కేవలం రాజకీయ ప్రయోజనాలే తప్ప, ఈ ఈడీ దాడుల్లో నైతికత మచ్చుకైనా కానరాదు. ఒకప్పుడు ఈడీలాంటి దర్యాప్తు సంస్థలు నేతలెవరిమీదైనా కేసులు నమోదు చేస్తే వారి అవినీతి గుట్టురట్టయిందని భావించేవారు. కొంతకాలం తరువాత ఈ కేసులు నిజమైనవా, లేక కక్షసాధింపు చర్యలా అన్న అనుమానాలు కలిగేవి. ఇక ఇప్పుడైతే ఇలాంటి చర్యలు కేవలం ప్రతీకార చర్యలు మాత్రమే అనుకునే స్థాయికి పరిస్థితులు మారాయి. ఇంతటి ''ఘనతకు'' అర్హుడు గనకనే ఈడీకి ముందు మోడీ చేరి, ఈడీ కాస్తా ''మోడీ ఈడీ''గా చలామణీ అవుతోంది.
ఇటీవల హిండెన్‌బర్గ్‌ నివేదిక అదాని అవినీతి సామ్రాజ్యాన్ని కుప్పకూల్చినంత పనిచేసింది. అదానీ దేశాన్ని ఇంతగా దగా చేయగలిగాడంటే అందుకు ప్రధాని మద్దతే కారణమని విమర్శలు వెల్లువెత్తాయి. ఈ వ్యవహారంపై దర్యాప్తు జరగాలని పార్లమెంటు అట్టుడుకుతున్నా అది కంఠశోషగానే మిగిలిపోతోంది. లక్షల కోట్ల ప్రభుత్వ సొమ్మును అప్పులుగా అదానీకి కట్టబెట్టిన సర్కారు నిర్వాకంపైనా, అదానీ అవినీతిపైనా ఏ ఉలుకూ పలుకూ లేదు. చివరికి న్యాయస్థానం తనంతట తానే ఓ కమిటిని నియమిస్తే, వీరు మాత్రం అదానినీ ఎలా కాపాడాలా అని ఆలోచిస్తున్నారు. అందులో భాగంగానే క్రికెట్‌ ముసుగులో ఆస్ట్రేలియా ప్రధానిని రప్పించి ఊసులాడారని గుసగుసలు గట్టిగానే వినిపిస్తున్నాయి. తమకు అనుకూలురైతే రక్షించడం, ప్రతికూలురైతే శిక్షించడం... ఇప్పుడిదే బీజేపీ మార్కు ప్రజాస్వామ్యం! అవినీతికి ఆధారాలుంటే ఎవరిపైనైనా చర్యలు తీసుకోవాల్సిందే. కానీ అస్మదీయులకో న్యాయం, తస్మదీయులకో న్యాయం. అన్న చందాన వ్యవహరించడమే ఇప్పుడీ 'మోడీ ఈడీ' చెపుతున్న న్యాయం! ఇది ఎంతటి దుర్వినియోగం.
