''అసలు పోయింది కొసరు పోయింది'' అన్న సామెత ప్రస్తుత తెలంగాణ సమాజానికి సరిగ్గా అబ్బుతది. నీళ్లు, నిధులు, నియామకాల నినాదంతో ఉధృతంగా సాగిన ఉద్యమంలో ప్రధాన భూమికను పోషించింది తెలంగాణ విద్యార్థి లోకం, యువతనే. రాష్ట్రం వస్తే మా ఉద్యోగాలు మాకు దక్కి మా బతుకులు బాగుపడతాయని ఉద్యమించిన విద్యార్థులకు, యువతకు వర్తమానంలో మొండి చెయ్యే కళ్ళకు కనిపించేసరికి పూర్తి నిరాశ, నిస్పృహలలో కూరుకుపోయింది. విద్యార్థులు, యువతే కాకుండా పెద్ద ఎత్తున ఉద్యమంలో పాల్గొన్నది ఉద్యోగ, ఉపాధ్యాయ లోకం. వీరు కూడా మెరుగైన సదుపాయాలు కొత్తరాష్ట్రంలో పొందవచ్చు అనే ఆశతోనే చేశారు. కానీ ఉద్యమ సంస్థగా ఉండి అధికారంలోకి వచ్చిన టీఆర్‌ఎస్‌ ప్రభుత్వం కొత్త ఉద్యోగాలేమో కానీ ఉన్న ఉద్యోగాలను ఊడబీకే పని పెట్టుకున్నది. అందుకు ఉదాహరణ వీఆర్వో వ్యవస్థ. ఉమ్మడి జిల్లాలుగా ఉన్నప్పుడే సుమారు 7000గా ఉన్నటువంటి పోస్టులలో దాదాపు 5500ఉద్యోగులు మాత్రమే ఉండి కొందరు వీఆర్వోలు రెండు, మూడు గ్రామాల బాధ్యతలు కూడా నిర్వర్తించారు. రెవెన్యూ వ్యవస్థలలో వీఆర్వోలే చాలా కీలకంగా పనిచేశారు. పై స్థాయి అధికారులకు ప్రజలకు మధ్య వారధిలా ఉండేవారు. అయితే అన్ని శాఖలలో ఉన్నట్లుగానే రెవెన్యూలో కూడా అవినీతి మకిలి ఉంది. దాన్ని తొలగించవల్సిందే. అందులో సందేహం లేదు. కానీ ఆ అవినీతి కారణంతో మొత్తంగా వ్యవస్థనే రద్దు పరిచి ఏడాది గడిచిపోయింది. వారిని వివిధ శాఖలలో సర్దుబాటు చేస్తాం అన్న ప్రభుత్వం ఆ ఊసే ఎత్తట్లేదు. ఇప్పుడు ఆ తొలగించబడ్డ ఉద్యోగులకు ఏ పేరు మీద జీతాలు ఇస్తున్నట్టు? అసలు వారు ఉన్నట్టా! లేనట్టా? ఇక పోతే ఆ తొలగించబడ్డ ఉద్యోగులను అదే రెవెన్యూ వ్యవస్థలో పనులు చేయించు కుంటున్నారు. వడ్ల కొనుగోలు కేంద్రాలవద్ద గుమస్తాగానో, వారి కార్యాలయాలలో కాగితాలు సర్దటానికో వినియోగిస్తున్నారు. ఇటీవల కొన్ని పత్రికలలో వీఆర్వోలు మూటలు మోస్తున్న కథనాలు కూడా ప్రచురితం అయినవి. ఇలా నిన్నటిదాకా అధికారులుగా ఉన్న ఉద్యోగులను అటెండర్‌ స్థాయికి దిగజార్చిన ఘనత మాత్రం మన తెలంగాణ ప్రభుత్వానిదే. ఆ అటెండరయినా ఒక పేరు, హౌదా, గుర్తింపుతో పనులు చేస్తారు. కానీ వీఆర్వోలకు అది కూడా లేదు. మరీ కాదనుకుంటే కొంతమంది వీఆర్వోలు ఊరికే ఉదయం వచ్చి సంతకాలు చేసి సాయంత్రం దాకా ఉండి పోతున్నారు. అయినా వారికి జీతాలు చెల్లిస్తున్నారు. వారితో ఎటువంటి విధులు చేయించకుండా ఎవరి సొమ్మని అంతటి ప్రజాధనాన్ని వృధా చేస్తున్నారు.
ప్రభుత్వం చెప్పినట్టు వీఆర్వోలు అవినీతికి పాటు పడితే ఆ అవినీతిని అరికట్టడానికి కఠినమైన చర్యలు తీసుకోవాలి. అవినీతి అధికారులపై శాఖాపరమైన చర్యలు తీసుకుని వారిపై నిరంతర నిఘా, పర్యవేక్షణ చెయ్యడం ప్రభుత్వానికి పెద్దగా కష్టమైన పనేం కాదు. కానీ ప్రభుత్వం ఆ పని చెయ్యకుండా ఆ వ్యవస్థను రద్దు పరిచి ఉద్యోగుల నోట్లో మన్ను కొట్టింది. నిజానికి మనం కుల్లా కుల్లా మాట్లాడుకుంటే ప్రతీ శాఖలో అవినీతి ఆరోపణలు వస్తూనే ఉంటాయి. ఉదాహరణకు రిజిస్ట్రేషన్‌శాఖలో ఆఫీసుల ముందు అనధికార వ్యక్తుల దుకాణంలో అధికారిక కార్యక్రమాలు యధేచ్చగా జరుగుతాయి. ఆ దుకాణాల వ్యక్తులతో పోకుంటే మన పనులు ఎంత కష్టమవుతాయో రిజిస్ట్రేషన్‌ ఆఫీసుకి వెళ్లిన అనుభవం ఉన్నవారిని ఎవరిని అడిగినా చెపుతారు. అక్కడ ఎంత దోపుకం జరుగుతుందో సులభంగా గ్రహించవచ్చు. మరి ఆ కారణం చెప్పి రిజిస్ట్రేషన్‌ వ్యవస్థను తొలగిస్తుందా? అంటే తొలగించదు. ఎందుకంటే దాని ద్వారా ఎంతో ఆదాయాన్ని ప్రభుత్వం ఆర్జిస్తుంది కనుక. ప్రభుత్వ ఉద్యోగులే కాదు ప్రజా ప్రతినిధులపై కూడా అవినీతి, అక్రమ సంపాదన ఆరోపణలు మనం పత్రికలలో చూస్తూనే ఉంటాం. వింటుంటాం. మరి ఆ వ్యవస్థను కూడా రద్దు పరిచే ధైర్యం చేస్తుందా. ఇలా చెప్పుకుంటూ పోతే అనేకం ఉన్నాయి. వాటికి ప్రభుత్వం సమాధానం ఇస్తుందా?
నిజానికి వీఆర్వో వ్యవస్థ రద్దు వెనుక పెద్ద కుట్ర దాగుంది. అది ఉద్యోగాల కుదింపు. తెలంగాణలో నిజానికి ఉద్యోగాల ఖాళీలు లేక కాదు. కేవలం ప్రభుత్వానికి ఖాళీలు నింపే ఉద్దేశంలేదు. దీనికి ఉదాహరణ తాత్కాలిక పద్ధతిలో/పొరుగు సేవల విధానంలో నియామకాలు జరుపడమే. ఈ తాత్కాలిక పద్ధతిలో/పొరుగు సేవల విధానం(ఔట్‌ సొర్సింగ్‌)లో జరిపిన నియామకాలన్నీ ప్రభుత్వం ఒప్పుకోని అధికారిక ఖాళీలే. ఇటీవల తెలంగాణ అసెంబ్లీ సాక్షిగా ముఖ్యమంత్రి 78,000 ఖాళీలను నింపడానికి అవసరమైన చర్యలు తీసుకుంటాం అని ప్రకటించారు. తెలంగాణ వస్తే ఏయే రంగాలలో మెరుగైన పురోభివృద్ధి ఉంటుంది అనుకున్నామో ఆయా రంగాలలో ఏ ఫలితాలూ కనపడటంలేదు. మొత్తం ప్రజానీకానికి తప్పనిసరి అవసరమైన విద్యా, వైద్యంలో ప్రభుత్వం యొక్క శ్రద్ద ఏపాటిదో ఏ ప్రభుత్వ పాఠశాలకో, ప్రభుత్వ ఆస్పత్రికో పోతే మనకే అర్థమవుతుంది. కరోనా వంటి భయానక స్థితులలో కూడా ప్రభుత్వ ఆసుపత్రుల డాక్టర్లకు సైతం పీపీఈ కిట్లు అందించని కారణంగా వైద్యులు ధర్నాలు చేసిన సంఘటనలు మనం తెలంగాణలో చూసినం. ఆక్సిజన్‌ బెడ్స్‌ లేక ఎంతమంది ప్రాణాలు వదిలారో, ఎంతమంది ప్రయివేటు ఆసుపత్రుల దోపుకానికి బలై ఆర్ధికంగా చితికిపోయారో మనమందరం చూసాం. వైద్యులు, ఇతర ఆరోగ్య సిబ్బంది కలిపి 8000 పైచిలుకు ఉన్న పోస్టులలో 2014 తర్వాత తెలంగాణ ప్రభుత్వం ఒక్కరంటే ఒక్క వైద్యుడిని శాశ్వత ప్రాతిపదికన నియమించడానికి నోటిఫికేషన్‌ విడుదల చేయలేదు. ఇటీవల వైద్యుల, వైద్య సిబ్బంది నియామకాల కోసం విడుదల చేసిన నోటిఫికేషన్లలో కొన్ని ఒప్పంద(కాంట్రాక్ట్‌) ప్రాతిపదికన అయితే మరికొన్ని పొరుగు సేవల(ఔట్‌ సోర్సింగ్‌) విధానంలో నియమించబడేవే. ఇక విద్యా వ్యవస్థను కావాలని ఉద్దేశ్య పూర్వకంగా నిర్లక్ష్య ధోరణితో చూస్తున్నారు. దీనికి ఇటీవల పత్రికలలో వచ్చిన 140మంది బాలికలకు ఒకటే మూత్రశాల అనేది ఒక ఉదాహరణ మాత్రమే. పాఠశాలలో పారిశుధ్య నిర్వహణకు కేటాయించిన స్కేవెంజర్స్‌ని తొలగించి పాఠశాలల పరిశుభ్రతని, పారిశుధ్యాన్ని గ్రామ పంచాయతీలు నిర్వహిస్తాయని ప్రభుత్వం చేతులు దులుపుకుంది. బంగారు తెలంగాణ, ధనిక రాష్ట్రంలో పాఠశాలలో కనీస మౌలిక సదుపాయాలు కల్పించుకోలేని స్థితిలో ఉన్నామా? అనేది ఆలోచించుకోవాలి. ఇకపోతే ప్రభుత్వమే ప్రకటించిన 20వేల ఉపాధ్యాయ పోస్టులను నింపడానికి ఎటువంటి చర్యలు తీసుకోవట్లేదు. ప్రభుత్వ మానస పుత్రికలైన గురుకులాలలో కూడా పూర్తి స్థాయిలో నియామకాలు జరుపలేదు. కరోనా తర్వాత పాఠశాలలో ఉపాధ్యాయుల ఖాళీల స్థానంలో కనీసం విద్యా వాలంటీర్లను కూడా నియమించలేదు. ఇక ఉన్నత విద్యావస్థను గాలికి వదిలేసింది అనవచ్చు. యూనివర్సిటీలలో 1600 ఖాళీలు నింపరు. మెరుగైన వసతులను కల్పించకపోవటమే కాక పేద, మధ్య తరగతి విద్యార్థులకు మెరుగైన విద్య దక్కకుండా ప్రయివేటు యూనివర్సిటీలకు ఎర్రతివాచీ పరిచింది తెలంగాణ ప్రభుత్వం. ప్రజలకు మెరుగైన పాలనను అందించడానికి పాలనా సౌలభ్యం కోసం కొత్త జిల్లాలను అయితే ఏర్పర్చింది కానీ వాటిలో సరిపడా ఉద్యోగుల నియామకాన్ని మరిచింది. ప్రతిశాఖలో ఖాళీలు వందల సంఖ్యలో ఉన్నప్పటికీ వాటిని చూసి చూడనట్టుగా వ్యవహరిస్తోంది. ప్రభుత్వానికి గనుక ఉద్యోగాల కల్పన పట్ల చిత్తశుద్ధి ఉంటే శాశ్వత నియామకాలు జరుపుతే తెలంగాణ సాధనలో నిజమైన ఆశయాలలో ఒకటీ నెరవేరినట్లే. కానీ ప్రభుత్వ చర్యల వల్ల నియామకాలలోనే కాదు పాలనలో, సంక్షేమ పథకాల అమలులో, హామీల అమలులో ప్రతీ దాంట్లో ఉన్నట్టా! లేనట్టా? అనే సంశయంలోనే తెలంగాణ ప్రజ ఉన్నది.
- వి. దిలీప్‌
సెల్‌:8464030808