సంబంధిత మౌలిక వసతులు, బడ్జెట్లో అధిక మొత్తంలో నిధులు కేటాయింపు, నాణ్యమైన అధ్యాపకులు, నూతన ఉత్పత్తుల సాంకేతికతలు, ఆవిష్కరణలకు దోహదపడే పరిశోధనలు, పరిశ్రమల అనుసంధానాలతో విశ్వవిద్యాలయాలను సరికొత్తగా మలిస్తే జ్ఞాన ఆధారిత ఆర్థిక వ్యవస్థగా ఇండియా ఆవిష్కృతమవుతుంది. పాఠశాల స్థాయి నుంచే వృత్తి విద్య బోధన, కళాశాలలో నైపుణ్య శిక్షణలతో యువ భారతం రాత మారుతుంది. కాలం చెల్లిన పాఠ్య ప్రణాళిక మార్చాల్సిన అవసరం ఉంది. అప్పుడే దేశంలోని విశ్వవిద్యాలయాలు ఉన్నత ప్రమాణాలకు నిలయాలుగా యువత సామర్థ్యాలను పెంచుకోగలిగే నైపుణ్య కార్ఖానాలుగా మారుతాయి.
ప్రపంచంలో 100 అత్యుత్తమ విశ్వ విద్యాలయాల జాబితాలో 2022 సంవత్సరానికి భారత్‌ నుండి ఒక్క విశ్వవిద్యాలయం సైతం లేకపోవడం దేశ విద్యా రంగ దుస్థితికి దర్పణం పడుతుంది. వచ్చే ఐదేండ్లలో 10 వేల కోట్ల రూపాయలు వెచ్చించి దేశవ్యాప్తంగా 20 విశ్వవిద్యాలయాలను ప్రపంచ స్థాయి సృజన కేంద్రాలుగా మారుస్తామని 2017లో ప్రధాని మోడీ ప్రకటించినా ఆ సుందర స్వప్నం నేటికీ మన ఉన్నత చదువుల స్థితిగతులను మార్చలేక పోయింది. బడ్జెట్లో నామమాత్రం నిధుల కేటాయింపు, ఆర్థిక వనరుల కొరత, బోధనా సిబ్బంది లేమి, నిర్వహణపరంగా మితిమీరిన నియంత్రణలు, కాలం చెల్లిన పాఠ్య ప్రణాళికలు వంటివి పైచదువులకు చెదలు పట్టిస్తున్నాయి. వాటిని పరిష్కరించడంలో చురుగ్గా వ్యవహరించాల్సిన కేంద్ర, రాష్ట్ర ప్రభుత్వాలు, పాలకులు యధాప్రకారం మాటలతో కోటలు కడుతున్నారు.
క్యూఎస్‌ ర్యాంకింగ్‌లో మనం ఎక్కడ ప్రతిష్టాత్మక క్యూఎస్‌ అంతర్జాతీయంగా విశ్వవిద్యాలయాల ప్రమాణాల తీరుతెన్నులను తెలుసుకోవడానికి ప్రతి ఏటా మదింపు చేపడుతూ ర్యాంకులు ప్రకటిస్తుంది. బోధన సిబ్బంది, విద్యార్థుల నిష్పత్తి, విదేశీ ఫ్యాకల్టీ నిష్పత్తి, విదేశీ విద్యార్థుల అడ్మిషన్లు, విశ్వవిద్యాలయ ప్రతిష్ట, పరిశోధనలు, పేటెంట్లు మొదలైన అంశాలలో మూల్యాంకన చేపట్టి ర్యాంకులను ప్రకటిస్తారు. 2022 సంవత్సరానికి ప్రపంచంలో 97 దేశాలకు చెందిన 1300 యూనివర్సిటీలు పోటీపడగా 100 మార్కులు సాధించి మసాచుసెట్స్‌ ఇన్సిట్యూట్‌ ఆఫ్‌ టెక్నాలజీ తొలి స్థానం సాధించింది. 99.5 స్కోర్‌తో ఆక్స్‌పర్డ్‌ యూనివర్సిటీ తర్వాత స్థానాన్ని ఆక్రమించింది. 98.7 మార్కులతో స్టాన్‌ ఫోర్డ్‌, కేంబ్రిడ్జ్‌ యూనివర్సిటీలు మూడో స్థానాన్ని ఆక్రమించాయి. తొలి 100 స్థానాల్లో అమెరికా, బ్రిటన్‌, కెనడా, సింగపూర్‌, చైనా, జర్మనీ ఫ్రాన్స్‌ తదితర దేశాలు చోటు దక్కించుకున్నాయి. గత ఐదేండ్ల కాలంలో ఈ దేశాలు పరిస్థితిని మెరుగుపరుచుకుంటే భారత్‌ మాత్రం దిగజారుతోంది. తొలి 100 ర్యాంకులు సాధించిన విశ్వవిద్యాలయ జాబితాలో భారత్‌ నుండి ఒక్క విశ్వవిద్యాలయం లేకపోవడం మన ఉన్నత విద్య దుస్థితికి అద్దం పడుతున్నది. దేశంలో ఇండియన్‌ ఇన్సిట్యూట్‌ ఆఫ్‌ బాంబే 46.4 స్కోరుతో 177వ స్థానాన్ని ఆక్రమించి క్యూఎస్‌ జాబితాలో భారత్‌ నుండి మొదటి స్థానాన్ని ఆక్రమించింది. ఇండియన్‌ ఇన్సిట్యూట్‌ ఆఫ్‌ ఢిల్లీ 185వ స్థానాన్ని, ఇండియన్‌ ఇన్సిట్యూట్‌ ఆఫ్‌ సైన్స్‌ బెంగళూరు 186వ స్థానాన్ని సాధించాయి. టాప్‌ 500 విశ్వవిద్యాలయాల జాబితాలో కూడా మన దేశం నుండి కేవలం ఎనిమిది మాత్రమే చోటు దక్కించుకున్నాయి. ఉభయ తెలుగు రాష్ట్రాల్లో ఏ ఒక్కటి కూడా ఆ ఘనతనూ సాధించలేకపోయాయి. ఇండియన్‌ ఇన్సిట్యూట్‌ ఆఫ్‌ హైదరాబాద్ 591వ స్థానాన్ని, యూనివర్సిటీ ఆఫ్‌ హైదరాబాద్ 651వ స్థానాన్ని సాధించాయి. ప్రపంచ విద్యాసంస్థల గుర్తింపునకు అవసరమైన ప్రమాణాల విషయంలో ఆసక్తి కనబరచకపోవడం వల్ల భారత విద్యాసంస్థలు వెనుకబడుతున్నాయి. క్యూఎస్‌ ర్యాంకింగ్‌లో భారతదేశం నుండి 2018లో 20 యూనివర్సిటీలు 2019లో 24 యూనివర్సిటీలు 2020లో 23యూనివర్సిటీలు 2021లో 21యూనివర్సిటీలు, 2022లో 22 యూనివర్సిటీలు టాప్‌-1000 స్థానాల్లో ఉన్నాయి. దేశంలోని విశ్వవిద్యాలయాల్లో రాజకీయ జోక్యం పెరిగి, బోధనాభ్యసన పరిశోధనల్లో నాణ్యత కొరవడింది. పారిశ్రామిక అనుసంధానం తక్కువగా ఉంది. నిధుల లేమి సౌకర్యాల కొరతతో విశ్వవిద్యాలయాలు కొట్టుమిట్టాడు తున్నాయి. విద్యార్థులు నామమాత్ర అభ్యాసంతో పట్టాలు అందుకుని నైపుణ్యాల కొరతతో నిరుద్యోగులుగా మిగిలిపోతున్నారు. అత్యున్నత విశ్వవిద్యాలయ జాబితాలో స్థానం సంపాదించుకోవాలంటే అత్యున్నత ప్రతిభ గల అధ్యాపకులను నియమించుకోవడం ఒకటే మార్గం. కానీ మన విశ్వవిద్యాలయాల్లో వైస్‌ ఛాన్సలర్ల, అధ్యాపకుల నియామకాల తీరులో అలసత్వం చోటుచేసుకుంటున్నది.
అధ్యాపకులే కీలకం
ఇతర విద్యావ్యవస్థలోనైనా బోధకులదే ముఖ్యపాత్ర. నాణ్యమైన విద్యను అందించడంలో ఇతరులది సహాయ పాత్రే. విద్యా ప్రమాణాల్ని ప్రభావితం చేసే అత్యంత ముఖ్యమైన అంశాల్లో విద్యా వ్యవస్థలో ఉండే బోధనా సిబ్బందిలోని నాణ్యతా సామర్థ్యం ప్రధానమైనదిగా చెప్పవచ్చు. బోధకులు విద్యార్థుల మధ్య నిష్పత్తి అధికంగా ఉంటే విద్యార్థుల సంఖ్య పెరుగుతూ ఉండడం వల్ల ఒక విద్యార్థిపై ఉపాధ్యాయుడి తగిన రీతిలో ఏకాగ్రత చూపలేని పరిస్థితి తలెత్తుతుంది. ప్రస్తుతం దేశంలో ఇలాంటి పరిస్థితి అన్ని విశ్వవిద్యాలయాల్లో ఉంది. దేశంలోని ప్రతిష్టాత్మక కేంద్రీయ విశ్వవిద్యాలయాలు, సాంకేతిక విశ్వవిద్యాలయాల్లో దాదాపుగా 12900 అధ్యాపక పోస్టులు ఖాళీగా ఉన్నాయి. 22 వేల బోధనేతర సిబ్బంది పోస్టులు ఖాళీగా ఉన్నాయి. అలాగే తెలంగాణ రాష్ట్రంలోని పది ప్రధాన యూనివర్సిటీలలో 1974 అధ్యాపక పోస్టులు ఖాళీగా ఉన్నాయి. ఆంధ్రప్రదేశ్‌ రాష్ట్రంలోని ఎనిమిది ప్రధాన యూనివర్సిటీలలో 108 వరకు అధ్యాపక పోస్టులు ఖాళీగా ఉన్నాయి. తొలి వేయి విశ్వవిద్యాలయాల జాబితాలో స్థానం సంపాదించిన ఉస్మానియా యూనివర్సిటీలో 848 అధ్యాపక పోస్టులు ఖాళీగా ఉన్నాయి. ఇండియన్‌ ఇన్సిట్యూట్‌ ఆఫ్‌ మేనేజ్‌మెంట్‌ విశాఖపట్నం యూనివర్సిటీలో దాదాపుగా 30 అధ్యాపక పోస్టులు ఖాళీగా ఉన్నాయి. తెలంగాణలోని జవహర్‌లాల్‌ నెహ్రూ సాంకేతిక విశ్వవిద్యాలయంలో 232 అధ్యాపక పోస్టులు ఖాళీగా ఉన్నాయి. ఇలాంటి ఖాళీల ఒత్తిళ్ల వల్ల అధ్యాపకులు అవసరమైన రీతిలో సన్నద్ధం కాలేని పరిస్థితి నెలకొంటుంది. పరిశోధనకు తగిన సమయం కేటాయించలేరు. బోధన అనుబంధ కార్యకలాపాలపైన దృష్టి సారించలేరు. సంబంధిత మౌలిక వసతులు, బడ్జెట్లో అధిక మొత్తంలో నిధులు కేటాయింపు, నాణ్యమైన అధ్యాపకులు, నూతన ఉత్పత్తుల సాంకేతికతలు, ఆవిష్కరణలకు దోహదపడే పరిశోధనలు, పరిశ్రమల అనుసంధానాలతో విశ్వవిద్యాలయాలను సరికొత్తగా మలిస్తే జ్ఞాన ఆధారిత ఆర్థిక వ్యవస్థగా ఇండియా ఆవిష్కృతమవుతుంది. పాఠశాల స్థాయి నుంచే వృత్తి విద్య బోధన, కళాశాలలో నైపుణ్య శిక్షణలతో యువ భారతం రాత మారుతుంది. కాలం చెల్లిన పాఠ్య ప్రణాళిక మార్చాల్సిన అవసరం ఉంది. అప్పుడే దేశంలోని విశ్వవిద్యాలయాలు ఉన్నత ప్రమాణాలకు నిలయాలుగా యువత సామర్థ్యాలను పెంచుకోగలిగే నైపుణ్య కార్ఖానాలుగా మారుతాయి.
సెల్‌:6301650324
