తాళికట్టుకోని కన్యత్వం
ఎప్పటిలానే
మరో కర్ణుడిని, చెత్తకుండికి
జత చేస్తుంది.

గన్నేరుపూల చెట్టు
విత్తనాన్ని ఎడారిలో వదిలేసి, వస్తుంది.

ఎండాకాలం ఆకాశం
ఆడమేఘాన్ని కని
ఎటో తప్పించుకుపారిపోతుంది.

నడిరేయి ఆ లేతదేహం కోసం
రాబందుల చప్పుడు విన్నప్పుడు
దాక్కోడానికి....
అమ్మరెక్కలదాపు జాడ
ఆ కోడిపిల్లకు కానరాదు.

ఏ దెయ్యమో కలలోకొచ్చినప్పుడు
అంత భయపడని
ఆ బుజ్జిగాడు....
నిద్రలేపే సూర్యున్ని చూస్తే వణికిపోతాడు....
మళ్ళీ ఆకలిపిల్లతో ఆడుకోమంటాడని.

ఫుట్‌ పాత్‌ పైన ఆ బక్కకడుపులో ఆకలిమంటలను....
కారులో వెళ్తున్న ఏ ఖద్దరుచొక్కాలు చూడవు.
ఆ ఆకలి వాసనను...
పక్కనే వెళ్ళే ఏ స్విగ్గిలు,
ఏ జోమాటలు, పసిగట్టవు.

ఆ పాతబడ్డభవనంలో
ఒంటిరెక్కకిటికి అంచున
కుంటిమంచంపై
దిగాలుముఖంతో
అనాధైన పేగొకటి
వేదనగీతాన్ని ఆలపిస్తూనే వుంటది.

ఒకరోజు
వాడు నడుస్తూ ,వెళ్తుంటాడు
ముళ్ళపొదల చాటున అరుపుని
రెండు అరచేతుల్లోకి
తీసుకొని,ముందుకెళ్తాడు....!

- జోగి నరేష్‌ కుమార్‌
నారయణ్‌ పేట జిల్లా