- వారి నుంచి 5 బైకులు స్వాధీనం
నవతెలంగాణ -భువనగిరిరూరల్‌
అంతర్‌ జిల్లాలో దొంగతనాలకు పాల్పడుతున్న ముగ్గుర్ని అరెస్టు చేసి బైకులు స్వాధీనం చేసుకున్నట్టు సీసీఎస్‌ ఇన్‌స్పెక్టర్‌ సైదయ్య, రూరల్‌ ఎస్సై హెచ్‌ రాఘవేందర్‌ తెలిపారు. పోలీసులు తెలిపిన వివరాల ప్రకారం... సిద్దిపేట జిల్లా, జగదేవ్‌ పూర్‌ మండలం, దవుల పూర్‌ గ్రామానికి చెందిన మస్కూరి నరేష్‌ అలియాస్‌ టిన్ను, కనుకూరి అజరు అలియాస్‌ అజరు కుమార్‌, కదుర్గ బాబునెల రోజుల క్రితం యమహా సుమారు 1,20,000 విలువ గల బైక్‌ దొంగతనం చేశారు. శుక్రవారం తెల్లవారుజామున ఉదయం ఆరు గంటలకు రాయగిరి చౌరస్తాలో తనిఖీలు నిర్వహిస్తుండగా యాదగిరిగుట్ట పోయే మార్గంలో ఈ ముగ్గురు యువకులు మోటార్‌ సైకిల్‌ పై వెళ్తుండగా అనుమానంతో వారిని తనిఖీ చేశారు. సరైన సమాధానం రాకపోవడంతో అనుమానం వచ్చి వారిని విచారించగా బైకులు దొంగతనం చేసిన చేసినట్టుగా తెలిపారు. గతంలో సిద్దిపేట, కుకునూరు పల్లి, కంచన్‌ బాగ్‌ పోలీస్‌ స్టేషన్లో మోటార్‌ సైకిల్‌ దొంగతనం చేశారు. వాటిని దౌలాపూర్‌ గ్రామంలో ఉంచారు. యాదగిరిగుట్ట ,భువనగిరి టౌన్‌ ,తుర్కపల్లి పోలీస్‌ స్టేషన్ల పరిధిలో మోటార్‌ సైకిళ్లకు దొంగతనం చేసినట్టు విచారణలో వెల్లడైందన్నారు. బైకు దొంగలను అరెస్టు చేసిన సీసీఎస్‌ ఇన్‌స్పెక్టర్‌ సైదయ్య, రూరల్‌ ఎస్సై రాఘవేందర్‌, సిబ్బందిని, డీసీపీ నారాయణరెడ్డి, ఏసీపీ వెంకట్‌ రెడ్డి, రూరల్‌ సిఐ వేణుగోపాల్‌ అభినందించారు.
