- పీసీసీ మాజీ అధ్యక్షులు ఉత్తమ్‌కుమార్‌రెడ్డి
నవతెలంగాణ-చౌటుప్పల్‌
మునుగోడు నియోజకవర్గ ఉప ఎన్నికల్లో కాంగ్రెస్‌పార్టీ ఎమ్మెల్యే అభ్యర్థి పాల్వాయి స్రవంతి గెలుపు ఖాయమని టీపీసీసీ మాజీ అధ్యక్షులు, నల్లగొండ ఎంపీ ఎన్‌.ఉత్తమ్‌కుమార్‌రెడ్డి తెలిపారు. గురువారం యాదాద్రిభువనగిరి జిల్లా చౌటుప్పల్‌ మున్సిపల్‌ కేంద్రంలోని పీబీ గార్డెన్స్‌లో ఆ పార్టీ బూత్‌ ఇన్‌చార్జీలు, గ్రామశాఖల అధ్యక్షులు, సమన్వయ కమిటీ సభ్యుల సమావేశం నిర్వహించారు. ఈ సందర్భంగా ఆయన మాట్లాడుతూ బీజేపీ, టీఆర్‌ఎస్‌ పార్టీలను ప్రజలు నమ్మే స్థితిలో లేరన్నారు. మతతత్వ బీజేపీని ప్రజలు బొంద పెడ్తారన్నారు. గత ఎన్నికల్లో బీజేపీకి ఎన్ని ఓట్లు వచ్చాయో ఇప్పుడు కూడా అన్ని ఓట్లే వస్తాయన్నారు. సమిష్టి కషితో మునుగోడులో కాంగ్రెస్‌పార్టీ విజయకేతనం ఎగురవేస్తుందన్నారు. మునుగోడులో కాంగ్రెస్‌పార్టీ అత్యధిక మెజార్టీతో గెలుస్తుందని సర్వేలు చెబుతున్నాయన్నారు. మునుగోడు ప్రభావంతో రాబోయే సార్వత్రిక ఎన్నికల్లో సత్తా చాటుతామన్నారు. తెలంగాణలో కాంగ్రెస్‌ ప్రభుత్వం అధికారంలోకి రావడం ఖాయమన్నారు. ఈ సమావేశంలో మాజీ మంత్రి రాంరెడ్డి దామోదర్‌రెడ్డి, పార్టీ ఎమ్మెల్యే అభ్యర్థి పాల్వాయి స్రవంతి, డీసీసీ అధ్యక్షులు కుంభం అనిల్‌కుమార్‌రెడ్డి, రాజేందర్‌రెడ్డి, చల్లమల్ల కష్ణారెడ్డి, ఆకుల ఇంద్రసేనారెడ్డి, సుర్వి నర్సింహాగౌడ్‌, నల్ల నరేందర్‌రెడ్డి, ప్రదీప్‌, ఏడు గ్రామాల బూతు స్థాయి నాయకులు పాల్గొన్నారు..
