- ఆలయాల అభివృద్ధికి నిధులు కేటాయించాలి
- భువనగిరి ఎంపీ కోమటిరెడ్డి వెంకట్‌రెడ్డి
నవతెలంగాణ-నల్లగొండ
ఎంతో విశిష్టమైన, చరిత్ర కలిగిన పచ్చల, ఛాయా సోమేశ్వరాలయాలకు ఎండోమెంట్‌ ప్రభుత్వం ప్రత్యేక గుర్తింపు తెచ్చేలా కృషి చేయాలని భువనగిరి ఎంపీ, కాంగ్రెస్‌ స్టార్‌ క్యాంపెయినర్‌ కోమటిరెడ్డి వెంకటరెడ్డి అన్నారు. మహాశివరాత్రి సందర్భంగా శనివారం నల్లగొండ పట్టణంలోని పచ్చల, ఛాయా సోమేశ్వరాలయాలను ఆయన సందర్శించి ప్రత్యేక పూజలు చేశారు. అనంతరం ఆయన మాట్లాడుతూ ఛాయా సోమేశ్వరాలయానికి ఎంతో ప్రత్యేకత ఉందని, గర్భగుడిలో శివలింగంపై ఛాయ పడడం అది ఎక్కడి నుంచి వస్తుందో నేటికి అంతుచిక్కని విశిష్టత ఆలయానికి ఉందన్నారు. ప్రభుత్వం ఇలాంటి దేవాలయాలకు నిధులు కేటాయించి అభివృద్ధి చేయాలని సూచించారు. కరోనా సమయంలో ఎంతో మంది చనిపోవడంతో పాటు ఆర్థికంగా, మానసికంగా, శారీరకంగా చితికి పోయారని, మళ్లీ ఇలాంటి విపత్తు భవిష్యత్లో రాకుండా చూడాలని భగవంతుడిని ప్రార్ధిస్తున్నానన్నారు. ప్రజలందరికీ మహాశివరాత్రి శుభాకాంక్షలు తెలిపారు. ఆయన వెంట జూలకంటి సైదిరెడ్డి, వల్లపు శ్రీనివాస్‌రెడ్డి, కార్తీక్‌, నాగరాజు, ఊశయ్య, వెంకట్‌రెడ్డి, జూలకంటి శ్రీనివాస్‌, బుర్రి యాదయ్య, రజిత, పెరిక వెంకటేశ్వర్లు, జానీ, గడిగ హిమబిందు, శ్రీనివాస్‌ తదితరులున్నారు.
