నవతెలంగాణ-సూర్యాపేట
ఇంటర్ ఫస్టియర్‌లో రాష్ట్రంలో మొదటి ర్యాంకు సాధించిన సూర్యాపేటకు చెందిన ఏనుగు అభినవి, నందమూరి మేఘనలను బుధవారం జిల్లాకేంద్రంలోని హైదరాబాద్ కాకతీయ హైస్కూల్‌ యాజమాన్యం అభినందనలు తెలిపి సన్మానించారు. ఈ సందర్భంగా పాఠశాల కరస్పాండెంట్‌ కొండా సతీష్‌ మాట్లాడుతూ హైదరాబాద్ కాకతీయ హైస్కూల్‌లో నాలుగో తరగతి నుండి పదో తరగతి వరకు చదువుకున్న అభినవి ఇంటర్మీడియట్‌ ప్రథమ సంవత్సరంలో 468 మార్కులు సాధించి రాష్ట్రస్థాయిలోనే ప్రథమ స్థానం పొందడం మా పాఠశాలకే గర్వకారణమన్నారు.అలాగే నందమూరి మేఘన ఏడో తరగతి నుండి పదో తరగతి వరకు తమ పాఠశాలలోనే చదువుకొని రాష్ట్రస్థాయిలో 465 మార్కులు సాధించడం అభినందనీయమన్నారు. అలాగే పాఠశాలలో చదువుకున్న ఎనిమిది మంది విద్యార్థులు 450 మార్కులపైగా సాధించారని తెలిపారు.ఈ కార్యక్రమంలో అధ్యాపకులు లక్ష్మణ్‌రావు, కృష్ణ, పూర్ణచందర్‌, గౌస్‌,జనార్దన్‌, మాధవి, అపర్ణ, శైలజ, విద్యార్థుల తల్లిదండ్రులు వీణ, అప్పారావు తదితరులు పాల్గొన్నారు.
