కొన్ని దోమలు ప్రవచనకారుల్ని కుట్టాయి. వాటికి వారి లక్షణాలొచ్చాయి. దాంతో అవి ప్రవచనాలు మొదలెట్టాయి. ఒక దోమ తిండిపోతు ప్రవచన కారుడ్ని కుట్టింది.. అది చెరువులోని గుర్రపుడెక్క మీద కూర్చుని ప్రవచనాలు మొదలెట్టింది.
రామాయ రామ భద్రాయ
రామ చంద్రాయ వేదసే
రఘునాధాయ నాథాయ
సీతాయా పతయేనమ:
జన్మలలో దోమ జన్మ ఉత్తమమైనది. ఉత్కృష్టమైనది. పెట్టిపుట్టిన వారికే దోమ జన్మ లభిస్తుంది. కేవలం దోమలకే పుట్టుకతోనే సంగీత జ్ఞానం అబ్బుతుంది. సంగీతము విన్నా సన్మార్గము గలదే మనసా? సంగీత సాధన ద్వారానే సర్వేశ్వరుని చూసే భాగ్యం కలుగుతుంది. మోక్షం సంప్రాప్తిస్తుంది. మన వాగ్గేయ కారులు ఎన్నో కీర్తనలు రాసారు. వాటిని మనం ఆలపించాలి.
శనగపిండికి బియ్యం పిండి కలపండి. దానిలో సరిపడా ఉప్పు, కారం వేయండి. నీళ్లు పోసి చపాతీ పిండిలా కలిపి మురుకుల గొట్టంతో కాగిన నూనెలో వేసి వేయించండి. మురుకులు తయారైపోతాయి.
శనగపిండికి బియ్యం పిండి సరిపడా కలుపుకోవాలి. దాన్ని వామూ, వెన్నా వేసి తగినన్ని నీళ్లు పోస్తూ ముద్దలా కలుపుకోవాలి. దాన్ని జంతికల గొట్టం ద్వారా కాగిన నూనెలో వేయిస్తే జంతికలవుతాయి.
శనగపిండికి సరిపడా నీళ్లు పోసి ముద్దగా చేసుకోవాలి. దాన్ని చిల్లుల గిన్నె ద్వారా నూనెలో వేసి గోలిస్తే బూంది అవుతుంది. దానికి నూనెలో వేయించిన పల్లీలు, కరివేపాకూ కలిపి తగినంత ఉప్పు కారం వేస్తే బూంది తయారవుతుంది.
శనగపిండితో చేసిన బూందీని చెక్కర పాకంలో కలిపి జీడిపప్పు, యాలకులూ, కిస్‌మిసూ వేసి ఉండలుగా చేస్తే బూందీ లడ్డు అవుతుంది.
పచ్చి మిరపకాయల్ని తీసుకుని గింజలు తీయాలి. వాటిలో కాస్త చింతపండు గుజ్జూ, వాము పెట్టాలి. వాటిని శనగపిండిలో ముంచి కాగిన నూనెలో వేసి వేయిస్తే మిరపకాయల బజ్జీలు రెడీ.
ఆలుగడ్డలను చక్రల్లా తరగాలి. వాటిని శనగపిండిలో ముంచి తీసి కాగిన నూనెలో వేసి గోలిస్తే ఆలూ బజ్జీలు రెడీ.
శనగపిండికి మైదా పిండి వేసి కలపాలి. దానిలో నెయ్యీ, అల్లం వెల్లుల్లీ పేస్టు వెయ్యాలి. సరిపడా కారమూ, ఉప్పు కలుపుకోవాలి. నీళ్లు పోస్తూ పూరి పిండిలా కలపాలి. దాన్ని చపాతీలా వత్తాలి. ఒక గ్లాసుతో దాన్ని గుండ్రం ముక్కలుగా కట్‌ చేసుకుని వాటిని నూనెలో వేయిస్తే చెక్కలు తయారైపోతాయి.
శనగపిండికి బియ్యం పిండి కలపాలి. పచ్చిమిర్చీ, అల్లమూ, ఉల్లిపాయలు, జీలకర్రా తగినతం ఉప్పు వెయ్యాలి. నీళ్లు పోసి అట్ల పిండిలా కలుపుకోవాలి. దాన్ని పెనం మీద వేసి కాలిస్తే అట్లు సిద్ధమవుతాయి.
శనగపిండిని తీసుకుని ఉండలు లేకుండా జల్లిచి పెట్టుకోవాలి. ఒక మూకుడులో నూనె తీసుకుని వేడి చేయాలి. మరో మూకుడులో చక్కెర పాకం పట్టాలి. ఆ పాకంలో శనగపిండి వేసి గరిటెతో తిప్పాలి. మధ్య మధ్యలో వేడి నూనె పోయాలి. గట్టిపడే స్థితికి వచ్చినప్పుడు దాన్ని ఒక ప్లేటులో వేసి చల్లబరిచి కత్తితో ముక్కలుగా కట్‌ చేస్తే మైసూర్‌ పాక్‌ రెడీ.
శనగపిండిని జల్లించాలి. జీడిపప్పు, నెయ్యీ వేసి వేయిం చాలి. ఒక బాండిలో పంచదార పాకం పట్టాలి. దానిలో ఇలాయిచీ పొడి వెయ్యాలి. వేయించిన శనగ పిండిని పంచదార పాకంలో వేసి గరిటెతో తిప్పితే హల్వా తయారవుతుంది.
శనగపిండిలో పెరుగు కలిపి ఐదారు గంటలు నానబెట్టాలి. అదులో పచ్చి మిర్చి ముక్కలూ, అల్లం తరుగూ, చెంచాడు పంచదారా, తగినంత ఉప్పు, బేకింగ్‌ సోడా కలిసి బాగా కలియ బెట్టాలి. ఒక మూకుడులో నీళ్లు పోసి స్టౌవ్‌ మీద పెట్టాలి. ఒక పళ్లెంలో పెరుగుతో కలిసిన శనగపిండిని వేసి నీళ్లు పోసిన మూకుడులో ఆ పళ్లెం ఉంచాలి. ఐదారు నిమిషాలైయ్యాక తాలింపి వేస్తే డోక్లా సిద్ధమవుతుంది.
ఇలా శనగపిండితో రకరకాల పిండి వంటలు చేయవచ్చు. పిండి వంటలెన్నయినా మూలము శనగపిండి మాత్రమే.
మనం కృష్ణున్ని ఆరాధిస్తాం. రాముణ్ని పూజిస్తాం. సుబ్రహ్మణ్య స్వామిని కొలుస్తాం. శివునికి అభిషేకం చేస్తాం. స్వామియే శరణం అయ్యప్ప శరణం అంటాం. నరసింహ స్వామిని కొలుస్తాం. వేంకటేశ్వరునికి ముడుపులు చెల్లిస్తాం. బుద్ధం శరణం గచ్ఛామి అంటాం. 'ఏకంసత్‌ విప్రా బహుదా వదంతి'
శనగపిండి వంటకాల్లాగే దేవుణ్ని రకరకాల పేర్లతో పిలుస్తాం. అలా పిలిచినప్పటికీ శనగపిండిలాగ దేవుడొక్కడే.
ఈ సత్యాన్ని గ్రహించిన వాడే జ్ఞాని.
మన పాలిట మహామంత్రి లత్కోర్‌ దోమనే సాక్షాత్తు విష్ణుమూర్తి కలియుగ దైవం.
ఆయనకు సుప్రభాతం అంటే గుడ్‌ మార్నింగ్‌
వేంకటేశ్వరునికి గుడ్‌ మార్నింగ్‌ చెప్పటానికి 330 మిలియన్ల దేవతలొచ్చారు. ఎలా వచ్చారంటే మొదట పుష్కరిణిలో వారు స్నానం చేసారు. తడి బట్టలతోనే స్వామి దర్శనం కోసం క్యూలో నిలుచున్నారు. వారిలో ఇంద్రుడూ, చంద్రుడూ, వరుణుడూ, అగ్ని వంటి దేవతలున్నారు. అగ్ని గట్టిగా మంత్రాలు చదువుతుంటే మిగతావాళ్లూ చదువుతున్నారు. మెల్లగా చదవమని ద్వార పాలకులైన జయవిజయులు వారిని హెచ్చరించారు. దేవతల రాజుననే అహంకారంతో అందర్నీ తోసుకుని ఇంద్రుడు ముందుకెళితే ఇవాళ నీకు అపాయింట్‌మెంట్‌ లేదు. రేపు రా అని వారన్నారు. 'వరవేత్ర హతోత్త మాంగా:' అంటే మాట వినని వారిని వెండి బెత్తంతో ఒకటేసారు.
మహామంత్రి దోమను చూడ్డానికి రోజూ ఎన్నో దోమలు వస్తుంటాయి. అపాయింట్‌మెంట్‌ ఉన్న వాటితోనే ఆయన మాట్లాడుతాడు. తక్కిన వాటిని జయవిజయుల్లాంటి గార్డు దోమలు వెళ్లిపొమ్మంటాయి. మాట వినకపోతే ఒక్కటేస్తాయి.
ఈ రోజుల్లో నాస్తిక వాదం ప్రబలిపోతున్నది. కొన్ని దోమలు ఆ వాదాన్ని బలపరుస్తున్నాయి. కలియుగ దైవం లాంటి మన మహా మంత్రిని ఆడిపోసుకుంటున్నాయి. ఆయనపై అభాండాలు వేస్తున్నాయి.
ధర్మోరక్షతి రక్షిత: ధర్మాన్ని మనం రక్షిస్తే ధర్మం మనని రక్షిస్తుంది.
స్వస్తి
కొన్ని పిల్ల దోమలు కరోనా కాలంలో చదువుకున్న పిల్లల్ని కుట్టాయి. వాటికి ఆ పిల్లల లక్షణాలొచ్చాయి.
''కరోనా అంటే ఏమిటి?'' అనే ప్రశ్నకు ఓ పిల్ల దోమ ఇలా జవాబు చెప్పింది.
''కరోనా హౌలీ తరువాత వచ్చే పండుగ. దీన్ని ప్రపంచంలో అందరూ జరుపుకుంటారు. ఈ పండుగ సమయంలో మార్కెట్‌ మూసేస్తారు. రవాణాను పూర్తిగా ఆపేస్తారు. అందరూ ఇళ్లలోనే ఉంటారు. రకరకాల వంటలు చేసుకుని తింటారు. మగవాళ్లు వండితే ఆడవాళ్లు మజా చేస్తారు. చుట్టాలను, బంధువులను ఆఖరికి స్నేహితులను ఇంటికి రానివ్వరు. స్కూళ్లకు బోలెడు సెలవులిస్తారు. పరీక్షలు లేకుండా అందర్నీ పాస్‌ చేస్తారు. కరోనా పండుగను అన్ని మతాల వారు జరుపుకుంటారు. ఇది అంతర్జాతీయ పండుగ. పోయినట్లే పోయి మళ్లీ మళ్లీ వచ్చే పండుగ. ఈ పండుగ సమయంలో మాస్క్‌లు పెట్టుకుంటారు. గుళ్లకు కూడా సెలవులిస్తారు. ఎన్నో రోజులు జరుపుకునే పండుగ ఇదొక్కటే. మాటిమాటికి చేతులు కడుక్కోవడం, మనిషి మనిషికి దూరముండటం ఈ పండుగ ఆచారం. 'ఐదో ఎక్కం చెప్పు' అని ఇంకో పిల్ల దోమతోని అంటే, అది ఇలా చెప్పింది -
ఐదొకట్ల ఆరు
ఐదు రెళ్ల ఎనిమిది
ఐదు మూళ్ల తొమ్మిది
ఐదు నాళ్ల పదకొండు
ఐదు ఐదుల పన్నెండు
ఐదు ఆర్ల పదిహేను
ఐదు ఏడ్ల పదిహేడు
ఐదు ఎన్మిదిల ఇర్వై
ఐదు తొమ్మిదిల తొంభై
ఐదు పదుల రెండు వందలు
తరువాయి వచ్చేవారం...

- తెలిదేవ‌ర భానుమూర్తి
  99591 50491