కూర్చున్న కొమ్మనే నరుక్కున్నట్లు
తన నెత్తిన తానే నిప్పులు పోసుకున్నట్లు
పాలు తాగుతూ తల్లి గుండెలపై తన్నినట్లు
తినే అన్నంలో మన్ను కలుపుకున్నట్లు

కడుపు నింపే అన్నదాతలపై
లాఠీ దెబ్బలు ఏంటి?
కార్లతో తొక్కించిచంపుడేంటి?
ప్రాణాల్ని పణంగా పెట్టి
ప్రజల ఆకలి తీర్చే అన్నదాతలపై
ఈ దాష్టీకం ఏమిటి?

మంటికి ప్రాణం పోసి
పైరును పసిపాపలా సాకి
అహర్నిశలు శ్రమించి
ప్రజల కడుపు నింపే కష్టజీవులపై
ఇంత కఠిన వైఖరి ఏమిటి?

తిండి గింజలనేమన్నా
ఫ్యాక్టరీలనుండి ఉత్పత్తి చేసుకుంటారా?
లేక కంప్యూటర్లలో డౌన్లోడ్‌ చేసుకుంటారా?

దేశానికి వెన్నెముక రైతులే కదా
మరి ఆ వెన్నెముకనే
నూతన వ్యవసాయ చట్టాల
పేరుతో విరిచేస్తుంటే
దేశం కుప్పకూలుతుంది
క్షామం రాజ్యమేలుతుంది.

మేలుకో భారతీయుడా ఇకనైనా
కనిపించని కుట్రలో బలవుతున్న
వ్యవసాయరంగాన్ని కార్పొరేట్ల
కబంధహస్తాల నుండి రక్షించుకో

- కె. నిర్మల కుమారి, ఖమ్మం