నేను కాషాయ దేశ భక్తను..
కర్కశ దేశ భక్తను..
నాలోని దేశభక్తి
హింసను ప్రేమిస్తుంది
ధ్వంసను ప్రేరేపిస్తుంది!

నా దేశభక్తి నిరూపించుకోవాలంటే
కత్తి మొనకు విద్వేషం పూనాల్సిందే!
దేశంనిండా ఒకే ఒక మతం కోసం
లౌకికవాదాన్ని తెగనరకాల్సిందే..

ఇక్కడ ఎవరికీ ఏ హక్కులూ లేవు
మీ నీడలో మీరు నిలబడి
ప్రశ్నిద్దామని అనుకుంటున్నారేమో..
మీ కాళ్ల కింద బుల్డోజరు తొండాలు లేచి
మీ ఉనికిని నిరంకుశకంగా కూల్చేయగలవు...
రేపటి ప్రశ్నను భ్రూణహత్య చేసి
మీ నిదురలోకి పీడకలల
విషవాయువులు నింపి
శాశ్వత సమాధి కట్టే దేశభక్తి నాది!

నేను పరమ దేశ భక్తను
పేదరికానికీ
అమెరికా అధ్యక్ష యాత్రికులకూ
మధ్య గోడ కట్టి...
నిరుపేదల ఆకలి వాకిట్లో
ఉరితాళ్ళు పంచుతాను...
చావునొప్పి తెలియకుండా
లాలిత్యంగా చంపుతూ వెర్రిగా నవ్వుకుంటాను..

దళితులు ముస్లింలు
హేతువాదులు బౌద్ధులు
అర్బన్‌ నక్సల్సు
వీళ్లంతా దేశ ద్రోహులు...
నాదేశ భక్తి నిరూపించడం కోసం
వీళ్ళను నిరోధించడమే నా కర్తవ్యం
దేశం గుండెల మీద బుల్డోజరుని నిలబెట్టి...
రాజ్యాంగాన్ని కూల్చేయడమే
ఇప్పుడు పరమ ధర్మం!

- రత్నాజీ నేలపూరి
  79015 96763