ఎండిన చెట్టుకు ఒక్క ఆకుపచ్చ ఆకైనా లేకుంటేనేం
అన్ని రంగుల పార్టీ జెండాలతో
అగ్ర తాంబూలంగా రాజకీయాలకు వేదికైంది
జెండాల అంగడి ఎండిన చెట్టు !
పక్షి గూళ్లకు జాగే లేదు !

ఎండిపోయిన చెట్టు ఒకటే !
వందల జెండాలకు ప్రకాండం
అండ దండ ఎజెండా !
మోడైనా పార్టీల జెండాలతో రెప రెప !

జాతీయ రహదారి పక్కన
ఉండే ఈ ఎండిన చెట్టు
జాతీయ ఎన్నికలకే అంకితమై పోయింది !

ఈ చెట్టు పేరు
మద్ది చెట్టు కాదు
రావి చెట్టు కాదు
వేప చెట్టు కాదు
జెండాల చెట్టు !

ఎండిన చెట్టు అభాగ్యంగా నా దేశానికి ప్రతీక
ఈ చెట్టును చూసి దేశంలో ఎన్ని పార్టీలున్నాయో
సర్వే చేయకుండానే చెప్పవచ్చు
చెట్టుకు ఏ ఋతువు లేదు
జెండాలు జెండాలుగా ఎన్నికల ఋతువు

జెండాల చెట్టుకు సెల్యూట్‌ కొడితే
అన్ని పార్టీలకు జేజేలు కొట్టినట్టే

ఎన్నో వానలకు చెట్టు చిగురిస్తే
పార్టీల జెండాలు కనపడకుండా పోతాయి
ఎండుటాకుల్లా రాలిపోతాయి !
అప్పుడు ఈ చెట్టు సస్యశ్యామల
నా దేశానికి మినార్‌ ఔతుంది.

- కందాళై రాఘవాచార్య
  8790593638